28 сәуір күні Сарыкөл ауданы әкімдігінде аудандық полиция бөлімінің жаңа бастығы — полиция полковнигі Бағытбек Серікұлы Дисюковты ресми таныстыру рәсімі өтті.
Жиынды аудан әкімі Марат Шымырбеков ашып, жүргізді. Жаңа басшыны таныстыру сөзін Қостанай облысы полиция департаменті бастығының орынбасары Айдос Сайлауұлы Идрисов сөйледі.
Аталған тағайындау Қазақстан Республикасы Ішкі істер министрлігімен келісім негізінде жүзеге асқаны атап өтілді. Бағытбек Дисюков ішкі істер органдарында 2004 жылдан бері қызмет атқарып келеді.
Еңбек жолында ол жедел бөлімшелерде түрлі лауазымдарды атқарып, ұйымдасқан қылмысқа қарсы күрес, есірткі бизнесіне қарсы іс-қимыл және криминалдық полиция салаларында қызмет еткен. Жаңа қызметке дейін Қарабалық ауданының полиция бөлімін басқарған.
Бағытбек Серікұлының Сарыкөл ауданының тумасы екені де ерекше аталып өтті. Бұл оның тағайындалуына айрықша мән береді.
Іс-шара барысында қоғамдық тәртіп пен азаматтардың қауіпсіздігін қамтамасыз ету құқық қорғау және жергілікті атқарушы органдардың басты міндеттерінің бірі екені айтылды. Жаңа басшының жетекшілігімен бұл бағыттағы жұмыстар жүйелі түрде жалғасып, құқықбұзушылықтардың алдын алу мен халық сенімін арттыруға басымдық берілетініне сенім білдірілді.
Сондай-ақ, бұған дейін аудандық полиция бөлімін басқарған Мереке Жақсылықұлына алғыс білдірілді. Ол Мендіқара ауданы полиция бөлімінің бастығы қызметіне тағайындалды. Оның Сарыкөл ауданындағы қызметі кезеңінде құқықтық тәртіпті нығайтуға қосқан үлесі жоғары бағаланды.
Кездесу соңында Бағытбек Серікұлына жаңа қызметінде табыс, нәтижелі жұмыс және аудан тұрғындарының игілігі жолындағы жемісті еңбек тілегі айтылды.
Ақпарат көзі : https://www.gov.kz/memleket/entities/kostanai-sarykol-audany-akimat/press/news/details/1212142?lang=kk
Жауап қалдыру