Мегаполистің білім беру жүйесі тұрақты дамып, оң серпін көрсетуде. Бүгінде Шымкенттің білім беру желісі 1481 ұйымды біріктіретін ауқымды құрылымға айналды. Онда 482 мыңнан астам бала мен жасөспірім білім алып, тәрбиеленуде. Жүйе білім берудің барлық деңгейін қамтиды: 654 балабақша мен 294 мектептен бастап, колледждер мен мамандандырылған дамыту орталықтарына дейін.
Мектепке дейінгі білімнің қолжетімділігін арттыру – басым бағыттардың бірі. Қазіргі таңда балабақшаларда 77 мыңнан астам бала тәрбиеленуде. Қалада кезек мәселесін кезең-кезеңімен азайту жұмыстары жүргізілуде: жыл басынан бері 15 жаңа жекеменшік балабақша ашылды. Қосымша ретінде сәуір айында 1500 орынға мемлекеттік тапсырыс орналастырылып, жыл соңына дейін тағы шамамен 2000 баланы қамту жоспарлануда. Сонымен қатар табиғи үдеріс те өз әсерін тигізуде: жыл сайын шамамен 15 мың түлек бірінші сыныпқа өтіп, жаңа бүлдіршіндерге орын босатады.
Оқушылардың білім сапасында да өсім байқалады. Егер оқу жылының бірінші тоқсанында бұл көрсеткіш 54% болса, үшінші тоқсанның соңында 60%-ға дейін артты. Бұл жүргізіліп жатқан жұмыстардың тиімділігін көрсетеді.
Өзгерістердің маңызды тетігіне қала әкімдігі бастамашы болған «Сапалы білім» жобасы айналды. Оның аясында өткен «Білім беру шебері» байқауы педагогтердің кәсіби деңгейін айқындайтын маңызды алаң болды. Онлайн кезеңге қатысқан 13 мың мұғалімнің ішінен финалға тек 21 педагог өтті. Жеңімпаздарға қала әкімінің 100 гранты табысталады, бұл ұстаздардың кәсіби дамуына зор серпін береді.
Шымкенттік оқушылар республикалық деңгейде жоғары нәтижелер көрсетуде. Республикалық олимпиаданың төрт кезеңі бойынша қала командасы 20 медаль жеңіп алды, оның ішінде 3 алтын бар. Бұл өткен жылмен салыстырғанда айтарлықтай жоғары нәтиже.
Оқушылардың шығармашылық әлеуетін дамытуға да ерекше көңіл бөлінуде. «Абай оқулары», «Озық ойлы ұлт», «Жыр додасы» сынды байқаулар жүздеген оқушыны біріктіріп, олардың аналитикалық ойлау қабілеті мен ұлттық құндылықтарға қызығушылығын арттыруда. Демеушілердің қолдауының арқасында жеңімпаздарға дипломдармен қатар ақшалай сыйлықтар да табысталады.
Шымкенттегі білім беру тек оқу үдерісімен шектелмейді. «Адал азамат» бағдарламасы аясында құндылықтарды қалыптастыру, құқықбұзушылықтың алдын алу және әскери-патриоттық тәрбие беру бағытында жүйелі жұмыстар жүргізілуде. Бүгінге дейін 6000-ға жуық оқушы далалық оқу-жаттығу жиындарына қатысып үлгерді. Сонымен қатар қалада «Рухы биік патриот сарбаз – ел қорғаны» атты республикалық форум өткізу жоспарлануда.
Қол жеткізілген нәтижелер – алдағы дамудың берік негізі. Шымкенттің заманауи білім беру ортасы жастардың бәсекеге қабілеттілігін арттыруға және озық технологияларды, соның ішінде жасанды интеллектіні енгізуге бағытталған. Бұл әрбір түлектің заман талабына сай болуына мүмкіндік береді.
Ақпарат көзі : https://www.gov.kz/memleket/entities/shymkent-ishki-sayasat/press/news/details/1213189?lang=kk
Жауап қалдыру