Бүгін Қазақстан Республикасы Ұлттық экономика министрлігінің Табиғи монополияларды реттеу комитеті коммуналдық қызметтер тұтынушылары үшін қоғамдық қабылдаулар өткізді. Мұндай іс-шаралар Комитеттің аумақтық департаменттері тарапынан еліміздің барлық өңірлерінде ұйымдастырылды.
Қабылдаулар дәстүрлі түрде Facebook әлеуметтік желісі арқылы онлайн-форматта өтті. Бұл азаматтардың қатысуына ашық қолжетімділікті қамтамасыз етіп, нақты уақыт режимінде сұрақтар қойып, мамандардан түсіндірме алуына мүмкіндік берді.
Іс-шара барысында Комитет өкілдері тариф қалыптастыру, реттелетін қызметтерге тарифтердің өзгеруі, коммуналдық қызметтер бойынша есептеулер, сондай-ақ сумен, жылумен және газбен жабдықтау салаларындағы өтінімдерді қарау мәселелерін қамтитын өзекті сұрақтарды түсіндірді.
Атап айтқанда, сумен жабдықтау және су бұру саласында қазіргі таңда реттелетін қызметтерді 477 табиғи монополия субъектісі көрсететіні, сондай-ақ тарифтерді белгілеу және инвестициялық бағдарламаларды іске асыру мәселелерін қамтитын 102 өтінімнің қаралуда екені атап өтілді.
Электр энергетикасы саласында тарифтерді қалыптастыру тәсілдері, оның ішінде тұтынушылар үшін түпкілікті баға құрылымы, сондай-ақ тарифтердің негізсіз өсуіне жол бермеу және тұтынушылар мен нарық субъектілерінің мүдделерінің теңгерімін қамтамасыз ету шаралары түсіндірілді.
Сондай-ақ теміржол саласы бойынша ақпарат ұсынылды, онда табиғи монополия субъектілерінің өтінімдері мен есептері, оның ішінде тарифтерді өзгерту және инвестициялық бағдарламаларды іске асыру мәселелері заңнама талаптарына сәйкес қаралуда.
«Энергетикалық және коммуналдық секторларды жаңғырту» ұлттық жобасын іске асыру мәселелеріне де ерекше назар аударылды. Инфрақұрылымды жаңарту, желілердің тозуын төмендету және коммуналдық қызметтердің сенімділігі мен сапасын арттыруға бағытталған тәсілдер түсіндірілді.
Бұдан бөлек, тұтынушылардың құқықтарын қорғау және табиғи монополия субъектілерінің қызметін реттеу тетіктері бойынша түсіндірмелер берілді.
Табиғи монополияларды реттеу комитеті ашықтықты қамтамасыз ету және реттелетін салалардағы негізгі мәселелер бойынша халықты ақпараттандыру мақсатында қоғамдық қабылдаулар өткізу тәжірибесін жалғастырады.
Ақпарат көзі : https://www.gov.kz/memleket/entities/krem/press/news/details/1214756?lang=kk
Жауап қалдыру