№8 жалпы білім беретін орта мектептің «Ұлан» клубының жас мүшелері және орталық қалалық кітапхананың белсенді оқырмандары өрт сөндіру бөлімі мен азаматтық қорғаныс музейіне барды. Оқушыларға арналған «Елім деген ерлер» атты танымдық экскурсияны кітапханашы Исимбаева Айсулу ұйымдастырды.
Ақтау қаласындағы №1 мамандандырылған өрт сөндіру бөлімінде болған экскурсия барысында оқушылар құтқарушылар мен өрт сөндірушілердің жұмысымен танысып, қауіпсіздік ережелері мен азаматтық қорғау органдары қызметкерлерінің қызмет ерекшеліктері туралы мәлімет алды.
Балалардың ерекше қызығушылығын заманауи өрт сөндіру техникалары, авариялық-құтқару құрал-жабдықтары және өрт сөндірушілердің арнайы киімдері тудырды. Бөлім қызметкерлері өрттер мен төтенше жағдайларды жою кезінде бөлімшелердің қалай әрекет ететінін түсіндіріп, тұрмыста және қоғамдық орындарда өрт қауіпсіздігі ережелерін сақтаудың маңыздылығын еске салды.
Азаматтық қорғаныс музейіндегі экскурсия да ерекше әсерлі өтті. Онда оқушылар құтқару қызметінің қалыптасу тарихымен танысып, архивтік фотосуреттерді, түрлі жылдардағы экспонаттар мен жабдықтарды көрді. Балалар өрт сөндірушілердің қызметі туралы әңгімелерді үлкен қызығушылықпен тыңдап, көптеген сұрақтар қойды.
Осындай іс-шаралар жас ұрпақтың қауіпсіздік мәдениетін қалыптастыруға, балалардың дүниетанымын кеңейтуге және құтқарушы мамандығына деген құрметті тәрбиелеуге ықпал етеді.
Маңғыстау облысы ТЖД
Ақпарат көзі : https://www.gov.kz/memleket/entities/emer-mangystau/press/news/details/1223221?lang=kk
Жауап қалдыру