Ұлан ауданына жұмыс сапары барысында Шығыс Қазақстан облысының әкімі Нұрымбет Сақтағанов «Қайрат» шаруа қожалығының мал шаруашылығы кешенінде болды.
Шаруашылық жетекшісі Асвад Усмаевтың айтуынша, мұндағы сүттің майлылығы 4,3 пайызға дейін жетеді. Ал кешен бригадирі Ирина Құрманғалиева мұндай көрсеткішке мал азығының теңгерімді рационының арқасында қол жеткізіліп отырғанын жеткізді. Рацион құрамына ұсақталған жем, күнжара және табиғи жайылым шөбі кіреді.
Бүгінде шаруашылықта 500 сауын сиыр бар. Сауын процесі толықтай дерлік автоматтандырылған: мұнда 24 сауу аппараты жұмыс істейді. Сауылған сүт арнайы танкерлерге құйылып, +4 градусқа дейін салқындатылады. Одан кейін өнім сапасын тексеру және қабылдау үшін сүт тасымалдайтын көліктер арқылы зертханаға жөнелтіледі.
Жаз мезгілінде бір сиыр тәулігіне 25-30 литрге дейін сүт берсе, қыста бұл көрсеткіш шамамен 20 литрді құрайды. Симменталь тұқымы жоғары сүт өнімділігімен қатар, ет сапасының жоғарылығымен де бағаланады.
Фотода – симменталь тұқымды сиырлар. Бұл ет пен сүт бағытындағы әмбебап ірі қара тұқымы. Шаруашылықта өндірілетін сүт «Шығыс-Сүт» кәсіпорнына жеткізіледі.
(Материалдарды пайдалану кезінде ШҚО әкімінің баспасөз қызметіне сілтеме жасау міндетті).
Ақпарат көзі : https://www.gov.kz/memleket/entities/akimvko/press/news/details/1224834?lang=ru
Жауап қалдыру