Биыл Құрбан айттың алғашқы күні 27 мамырға сәйкес келеді. Осыған байланысты Қарағанды облысы аумағында құрбан шалуға арналған арнайы орындар анықталды.
— Құрбан шалу — адамды руханиятқа жақындататын құлшылық. Жағдайы бар адам үшін бұл — міндетті амал. Ал шамасы келмесе, оған мұндай міндет жүктелмейді, — деді Естай Әбдіғали, Қарағанды облысының бас имамы.
Оның айтуынша, Құрбан айт намазы өңірде 27 мамыр күні таңғы сағат 06:30-да оқылады. Намаздан кейін облыстық Әнет баба мешіті ауласында ұлттық спорт түрлерінен жарыстар мен Qurban Fest – 2026 отбасылық шарасы өтеді. Қонақтарға арналған балалар бағдарламалары, аниматорлар, фото аймақтар мен жәрмеңке ұйымдастырылады.
Сондай-ақ облыстың қала-аудандарындағы мешіттер аумағында киіз үйлер тігіліп, мәдени-рухани іс-шаралар өткізіледі.
Қарағанды қаласында құрбан шалу рәсіміне арналған арнайы орындар мына мекенжайларда белгіленді:
* Резник көшесі, 18;
* Н. Гоголь көшесі, 2/23 («Арай KZ»);
* С. Сейфуллин көшесі, 53.
Сонымен қатар, мұқтаж отбасыларға етті тарату және жеткізу бойынша штаб жұмысы ұйымдастырылды.
— Ислам адамға шамадан тыс ауыртпалық жүктемейді. Сондықтан құрбан шалу үшін несие алып немесе отбасын қиын жағдайға қалдыру дұрыс емес. Сондай-ақ құрбандық тек айт намазынан кейін шалынуы керек екенін ұмытпаған жөн. Егер одан ертерек шалынса, құрбандық қабыл болып есептелмейді. Адам етті толықтай өз отбасына қалдыра алады, бұл шариғатқа қайшы емес. Дегенмен оны туыстарымен және мұқтаж жандармен бөлісу — сауапты әрі абзал іс, — деп түсіндірді Данияр Кемербаев, Әнет баба мешітінің наиб имамы.
Қашықтан құрбан шалуға арналған онлайн-платформа да жұмысын жалғастырады — QURBAN.MUFTYAT.KZ. Қызмет ақысын Kaspi QR арқылы төлеуге болады. Рәсім орындалғаннан кейін арнайы есеп ұсынылады.
Фото: Қазақстан мұсылмандары діни басқармасынің Қарағанды облысы бойынша өкілдігі
Ақпарат көзі : https://www.gov.kz/memleket/entities/karaganda/press/news/details/1225225?lang=ru
Жауап қалдыру