Кәсіптік бағдар беру жұмысы аясында бүгін Қостанай облысы Полиция департаментінде облыс орталығындағы мектептердің бітіруші сынып оқушылары үшін Қостанай облысы ПД музейі мен Жедел басқару орталығының залына таныстыру экскурсиясы ұйымдастырылды.
Іс-шараға Қостанай қаласының түрлі мектептерінен шамамен 150 оқушы қатысты. Экскурсия барысында оқушыларға Қостанай облысы полициясының қалыптасуы мен даму тарихы, ішкі істер органдары қызметкерлерінің еңбегі, қызметтік міндеттерін атқару кезінде ерлік пен жанқиярлық танытқан батырлар, сондай-ақ өңірдегі құқықтық тәртіп пен қауіпсіздікті қамтамасыз етуге елеулі үлес қосқан ардагерлер туралы айтылды.
Оқушылар үшін Жедел басқару орталығының залы ерекше қызығушылық тудырды. Онда оларға бейнебақылау жүйесінің заманауи мүмкіндіктері мен полиция жасақтарының жұмысын үйлестіру тәсілдері көрсетілді. Сонымен қатар, жастарға ішкі істер органдарындағы қызметтің ерекшеліктері, Қазақстан Республикасы ІІМ ведомстволық оқу орындарына түсу шарттары және полициядағы қызметтің болашағы туралы ақпарат берілді.
Осындай іс-шараларды өткізу жастарды патриоттық рухта тәрбиелеуге, полицияға деген сенімді арттыруға және өскелең ұрпақтың ішкі істер органдарындағы қызметке қызығушылығын қалыптастыруға бағытталған.
Ақпарат көзі : https://www.gov.kz/memleket/entities/mvd-kostanay/press/news/details/1226378?lang=ru
Жауап қалдыру