19-20 мамырда Астанадағы Тәуелсіздік сарайында ЮНЕСКО-ның қолдауымен «Алтын Орда – дала өркениетінің үлгісі: тарих, археология, мәдениет, бірегейлік» атты халықаралық симпозиум өтті. Іс-шараға Қазақстан Президенті Қасым-Жомарт Тоқаев қатысты.
Бұл ауқымды халықаралық форум Жошы ұлысының мұрасын және оның Орталық Еуразия тарихындағы рөлін жан-жақты зерттеу мақсатында отандық және шетелдік жетекші ғалымдарды, сарапшыларды, дипломаттарды және халықаралық ғылыми қауымдастықтың өкілдерінің басын біріктірді.
Симпозиум тарих ғылымын дамыту және елдің өркениеттік мұрасын халықаралық деңгейде насихаттау жөніндегі Қазақстанның стратегиялық бағытын растады. Бүгінде Қазақстан Алтын Орда тарихын зерттеу саласындағы халықаралық негізгі орталықтардың бірі ретіндегі өз орнын нығайтуда.
Симпозиумның мақсаты – Жошы ұлысының саяси, экономикалық, мәдени және рухани мұрасын жан-жақты талдау және оның Еуразиядағы қазіргі интеграциялық үдерістердегі маңызын анықтау.
Алтын Орда қазақ хандығының тарихи алғышарты ретінде ерекше орын алады және қазақ халқының қалыптасуында маңызды рөл атқарды. Алтын Орда дәуірінде мемлекеттіліктің, сауданың, мәдениеттің және дипломатияның дамуымен қатар түркі-мұсылман өркениеттік кеңістігі қалыптасты.
Форумға 300-ден астам ғалым мен сарапшы, соның ішінде әлемнің 20-дан астам елінен келген 120 шетелдік зерттеуші қатысты. Қатысушылардың қатарында ортағасырлық тарихшылар, археологтар, шығыстанушылар, түркітанушылар, моңғолтанушылар, нумизматтар, саясаттанушылар, мәдениеттанушылар, дипломаттар және халықаралық ұйымдардың өкілдері болды.
Форумның негізгі құжаттарының бірі – «Алтын Орда мұрасы туралы Астана декларациясы», оның мақсаты – халықаралық ғылыми ынтымақтастықты дамыту, тарихи естелікті сақтау және түрлі елдердегі зерттеу орталықтары арасындағы өзара әрекеттестікті нығайту.
Дереккөз: “CentralAsia”
Ақпарат көзі : https://www.gov.kz/memleket/entities/mfa-roma/press/news/details/1226921?lang=ru
Жауап қалдыру