«Ertis» Жоғары инновациялық аграрлық колледжінің студенттері Қырғызстанда Ыстықкөл облысының ветеринариялық қызметі базасында өткен «Ветеринария» мамандығы бойынша халықаралық кәсіби шеберлік байқауына қатысты.
Іс-шараны Қ.И. Скрябин атындағы Қырғыз ұлттық аграрлық университеті жанындағы Сұлтан Ибраимов атындағы агротехникалық колледж ұйымдастырды. Байқауға сондай-ақ Шығыс Қазақстан көпсалалы колледжінің өкілдері де қатысты. Бұл үш оқу орнын агроөнеркәсіптік сектор үшін кәсіби білім беруді дамытуға, тәжірибе алмасуға және халықаралық ынтымақтастықты нығайтуға бағытталған серіктестік байланыстар біріктіреді.
Бұл серіктестік бірнеше жылдан бері дамып келеді. Өткен жылдың жазында «Ertis» Жоғары инновациялық аграрлық колледжі Қырғызстаннан, кейін Шығыс Қазақстаннан келген әріптестер мен студенттер делегацияларын қабылдаған болатын. Сол кезде қатысушылар оқу орнының жұмысымен танысып, тәжірибе алмасып, бірлескен жұмыстың келешегін талқылады. Ал бұл жолғы сапар серіктестік байланыстарды нығайтудың кезекті кезеңіне айналды.
Павлодар облысының атынан халықаралық байқауға «Ertis» колледжінің екінші курс студенттері Дәурен Камалбек пен Нұртілек Бекмұхамбет қатысты. Қатысушылар теориялық білімдерін ғана емес, сонымен қатар практикалық дағдыларын да көрсетуі тиіс болды: ветеринариялық манипуляцияларды орындау, кәсіби тапсырмаларды шешу, зерттеулер жүргізу және клиникалық рәсімдерді орындау. Байқау қорытындысы бойынша студент Дәурен Камалбек жоғары нәтиже көрсетіп, екінші орын иеленді.
Павлодар облысы білім басқармасының қолдауымен ұйымдастырылған бұл сапар «Ertis» Жоғары инновациялық аграрлық колледжінің студенттері үшін ғана емес, оқытушылары үшін де маңызды болды. Колледж делегациясы жетекші Айгуль Байжұманқызының бастауымен диалог алаңына қатысып, Қырғызстанның үздік колледждерінің біріндегі оқу процесінің ұйымдастырылуымен, болашақ мамандарды тәжірибелік даярлау жүйесімен және халықаралық кәсіби жарыстарды өткізу ерекшеліктерімен танысты.
Ақпарат көзі : https://www.gov.kz/memleket/entities/pavlodar-edu/press/news/details/1228579?lang=ru
Жауап қалдыру