Туризм секторын дамыту жөніндегі Үйлестіру кеңесінің алғашқы отырысы Премьер-министрдің орынбасары – Мәдениет және ақпарат министрі Аида Балаева төрағалығымен өтті. Кеңес 2026 жылдың сәуір айында туризм саласындағы орталық мемлекеттік органдардың, бизнес өкілдерінің және сарапшылық қауымдастықтардың жұмысын үйлестіруге арналған тұрақты ведомствоаралық алаң ретінде құрылды, деп хабарлайды Primeminister.kz.
Кеңес отырысына Туризм және спорт, Экология және табиғи ресурстар, Цифрлық даму, инновациялар және аэроғарыш өнеркәсібі министрліктерінің, жергілікті атқарушы органдардың өкілдері, сондай-ақ бизнес қауымдастық мүшелері қатысты.
Үйлестіру кеңесінің негізгі мақсаты – саладағы жүйелі кедергілерді жою, нақты қолданбалы шешімдерді әзірлеу және туристік жобаларды іске асыруды жеделдету. Кеңестің құрылуы туризм саласын кешенді басқару қажеттілігімен байланысты, себебі бұл сала инфрақұрылым, инвестициялар, көлік, экология, визалық және көші-қон реттеуі, сондай-ақ цифрландыру сияқты өзара байланысты бірнеше бағытты қамтиды.
Кездесу барысында Туризм және спорт вице-министрі Бауыржан Рапиков 2029 жылға дейінгі туризмді дамыту тұжырымдамасын іске асыру жөніндегі жаңартылған іс-қимыл жоспарын таныстырды. Құжат алты негізгі бағыт бойынша 61 іс-шараны қамтиды. Олардың қатарында инфрақұрылымды дамыту, инвестициялық ахуалды жақсарту, туристік өнімдерді қалыптастыру және саланы ілгерілету мәселелері бар.
Кездесуде қазақстандық нарықтағы халықаралық қонақүй брендтерінің үлесін арттыру және елдің туристік әлеуетін шетелдік нарықтарда жүйелі түрде ілгерілету мәселелеріне ерекше назар аударылды. Сонымен қатар, автотуризм, ат туризмі, гастрономиялық туризм және MICE-туризм сияқты бағыттарды дамыту, іс-шаралар күнтізбесін жетілдіру және визалық саясатты оңтайландыру мәселелері талқыланды.
Бұдан бөлек, аңшылық туризмнің әлеуеті мен оның дамуына кедергі келтіретін факторлар қарастырылды. Сондай-ақ ұлттық парктердегі экотуризмді дамыту, туристік жүктемені реттеу және тарихи-мәдени мұра нысандарын туристік инфрақұрылымға енгізу мәселелері кеңінен талқыланды.
Кездесу қорытындысы бойынша Аида Балаева туризм ел экономикасының дамуына тікелей ықпал ететін маңызды салалардың бірі екенін атап өтті. Ол өңірлермен ынтымақтастықты күшейтіп, әр аймақтың ерекшелігін, туристік әлеуеті мен инфрақұрылымдық мүмкіндіктерін ескеретін нақты әрі егжей-тегжейлі жоспарлар әзірлеуді тапсырды.
Вице-премьер археологиялық ескерткіштер мен жекелеген археологиялық аймақтарға ерекше назар аудару қажеттігін де атап өтті.