Қоршаған ортаны қорғау – мемлекет пен қоғам алдындағы маңызды міндеттердің бірі. Батыс Қазақстан облысында бұл бағыттағы жұмыстарға табиғатты қорғау полициясының қызметкерлері белсенді үлес қосып келеді, – деп хабарлайды Polisia.kz. Олар табиғи ресурстарды сақтау, экологиялық тәртіпті қамтамасыз ету және құқық бұзушылықтардың алдын алу мақсатында күн сайын рейдтік және профилактикалық іс-шаралар өткізеді. Бұл жұмыстың маңызы республикалық “Таза Қазақстан” экологиялық акциясы аясында одан әрі арта түсті. Табиғатты қорғау полициясының бір күндік қызметі олардың жұмысының ауқымы мен жауапкершілігін айқын көрсетеді. Рейдтік іс-шараларға полиция қызметкерлерімен қатар жергілікті атқарушы органдардың өкілдері, орман шаруашылығы мен балық қорғау саласының мамандары, сондай-ақ коммуналдық қызметтердің өкілдері қатысады. Олардың басты мақсаты – экологиялық құқық бұзушылықтарды анықтап, жолын кесу және табиғат қорғау заңнамасының сақталуын қамтамасыз ету. Рейдтер су айдындарын, орман алқаптарын, аңшылық шаруашылықтарды, қоғамдық орындар мен демалыс аймақтарын қамтиды. Тексеру барысында заңсыз аңшылық, браконьерлік, балықты заңсыз аулау, қоршаған ортаны ластау және абаттандыру қағидаларын бұзу деректері анықталады. Батыс Қазақстан облысы полиция департаментінің мәліметіне сәйкес, жылдың алғашқы бес айында қоршаған ортаны қорғау саласында 11 қылмыс тіркелген. Оның ішінде екі заңсыз аңшылық фактісі, балық ресурстары мен өзге де су жануарларын заңсыз аулаудың бес дерегі, сирек кездесетін және жойылып кету қаупі бар жануарлар түрлерінің заңсыз айналымына қатысты бір факт, сондай-ақ табиғи ресурстарды заңсыз пайдалану мен қылмыстық жолмен алынған мүлікті өткізуге байланысты үш қылмыс анықталған. Сонымен қатар есепті кезеңде табиғат пайдалану саласында 378 әкімшілік құқық бұзушылық тіркелді. Оның 213-і аңшылық қағидаларын бұзуға, ал 165-і балық аулау талаптарын сақтамауға қатысты. Полиция қызметкерлері профилактикалық жұмыстарға ерекше мән береді. Рейдтер барысында тұрғындармен түсіндіру жұмыстары жүргізіліп, табиғат қорғау заңнамасын бұзғаны үшін қарастырылған жауапкершілік туралы ақпарат беріледі. Сондай-ақ азаматтар табиғи байлықтарға ұқыпты қарауға және қоршаған ортаны қорғауға шақырылады. Өңірде “Таза Қазақстан” республикалық экологиялық акциясын жүзеге асыруға ерекше көңіл бөлінуде. Осы мақсатта облыс аумағында 67 мобильді топ құрылып, олар тұрақты негізде абаттандыру қағидаларының сақталуын бақылап, қоғамдық орындарды ластау фактілерін анықтап келеді. Акция басталғалы бері облыс аумағында 27 127 әкімшілік құқық бұзушылық анықталған. Олардың басым бөлігі қоғамдық орындарды ластау, абаттандыру қағидаларын бұзу және заңсыз сауда жасау фактілеріне қатысты. Тек Орал қаласының өзінде тұрғын үй-коммуналдық шаруашылық мекемелерімен бірлесіп 30-дан астам рейдтік іс-шара ұйымдастырылды. Сонымен қатар пәтер иелері кооперативтерінің төрағаларымен, кәсіпкерлермен және тұрмыстық қатты қалдықтарды шығарумен айналысатын ұйымдардың басшыларымен профилактикалық кездесулер өткізілді. Қабылданған шаралар нақты нәтижесін беруде. Облыс орталығында 30 стихиялық қоқыс үйіндісі толықтай жойылып, коммуналдық қызметтермен бірлесіп абаттандыру қағидаларының бұзылуын жою жөнінде 945 нұсқама берілді. Сондай-ақ абаттандыру қағидаларын бұзғаны үшін 1614 азамат әкімшілік жауапкершілікке тартылды, заңсыз сауданың 515 фактісі анықталды және қоғамдық орындарды ластағаны үшін 121 адам жауапқа тартылды. Экологиялық қауіпсіздікті қамтамасыз ету және табиғатқа зиян келтіретін құқық бұзушылықтардың алдын алу жұмыстары алдағы уақытта да жүйелі түрде жалғасады. Табиғатты қорғау полициясының басты мақсаты – құқық бұзушыларды жауапкершілікке тартумен қатар, қоғамда заң бұзушылықтарға мүлдем төзбеушілік қағидатын қалыптастыру және қоршаған ортаға жауапкершілікпен қарау мәдениетін нығайту. Табиғатты қорғау әр адамның жеке жауапкершілігінен басталады. Сондықтан қоршаған ортаны сақтау жолындағы әрбір игі іс – болашақ ұрпақ үшін экологиялық қауіпсіз әрі таза Қазақстанды қалыптастыруға қосылған маңызды үлес.
Ақпарат көзі : https://www.gov.kz/memleket/entities/mvd-zko/press/news/details/1242743?lang=ru
Жауап қалдыру