Егіс науқанынан ораққа дейін: басты міндет – өнімді сақтап қалу

Солтүстік Қазақстан облысында көктемгі егіс науқаны аяқталды. Биыл жалпы егіс алқабы 4,3 млн гектарды құрады. Өңірде егіс құрылымын әртараптандыру және неғұрлым табысты дақылдарға көшу жұмыстары жалғасуда.

Биыл дәнді дақылдар алқабы 100 мың гектарға қысқарып, 2,9 млн гектарды құрады. Сонымен қатар, майлы дақылдар алқабы екінші жыл қатарынан 1 млн гектарға жетті. Мал азықтық дақылдар 405 мың гектарға орналастырылды. Картоп пен көкөніс дақылдарының алқабы өткен жылғы деңгейде сақталып, тиісінше 8,6 мың және 1,4 мың гектарды құрады.

Бүгінде дәнді және майлы дақылдардың жағдайы жақсы. Бұл лайықты өнім алуға негіз қалыптастырады. Алайда егіс науқанының аяқталуы аграрийлер жұмысының аяқталғанын білдірмейді. Қазір ауыл шаруашылығы тауарын өндірушілердің алдында тұрған басты міндет – қалыптасқан өнім әлеуетін орақ науқанына дейін сақтап қалу.

Ағымдағы маусым жағдайында егісті фитосанитариялық қорғауға ерекше көңіл бөлінуде. Облыста арамшөптерге, зиянкестерге және ауыл шаруашылығы дақылдарының ауруларына қарсы белсенді жұмыс жүргізіліп жатыр. Бұл шаралар өнімділік шығынын азайтып, егістіктің тұрақты дамуын қамтамасыз етуге мүмкіндік береді.

Бүгінгі таңда облыс бойынша арамшөптерге қарсы гербицидтік өңдеу 144,3 мың гектар алқапта жүргізілді. Зиянкестерге қарсы өңдеу 105,5 мың гектарда, ауруларға қарсы өңдеу 57,1 мың гектарда орындалды.

Есіл ауданында гербицидтік өңдеу 5,1 мың гектар алқапта жүргізілді. Зиянкестерге қарсы 4,6 мың гектар, ауруларға қарсы 1,2 мың гектар өңделді.

Аграрийлерді қолдаудың маңызды тетіктерінің бірі – пестицидтер сатып алуға жұмсалатын шығындарды мемлекеттік субсидиялау. Қолданыстағы қағидаларға сәйкес, мемлекет өсімдіктерді қорғау құралдары құнының 50%-ына дейін субсидиялайды. Бұл ауыл шаруашылығы тауарын өндірушілерге егісті уақытылы өңдеуге және өнімнің сақталуын қамтамасыз етуге мүмкіндік береді.

Қазіргі таңда облыс аграрийлерінің барлық күш-жігері өнімді сақтауға, қолайлы фитосанитариялық жағдайды қамтамасыз етуге және алдағы орақ науқанына сапалы дайындалуға бағытталған. Жұмыс қарқыны сақталып, ауа райы қолайлы болған жағдайда өңірдің ауыл шаруашылығы тауарын өндірушілері лайықты өнім алып, елдің азық-түлік қауіпсіздігіне елеулі үлес қоса алады.

Ақпарат көзі : https://www.gov.kz/memleket/entities/sko-sayasat/press/news/details/1242891?lang=ru