ЖҮКТІ ӘЙЕЛДЕРГЕ АРНАЛҒАН ЕҢБЕК КЕПІЛДІКТЕРІ: 2026 ЖЫЛЫ БІЛУ МАҢЫЗДЫ

«СҚО бойынша Мемлекеттік еңбек инспекциясы комитетінің департаменті» РММ Қазақстан Республикасының Еңбек кодексінде бекітілген жүкті әйелдердің негізгі құқықтары мен кепілдіктерін еске салады.

1. НЕГІЗГІ ЕРЕЖЕ: ЖҰМЫС ОРНЫН САҚТАУ!

Есте сақтаңыз: жұмыс берушінің бастамасы бойынша жүкті әйелмен еңбек шартын бұзуға ҚАТАҢ ТҮРДЕ ТЫЙЫМ САЛЫНАДЫ (ҚР ЕК 54-бабы).

Бұл ережеден жалғыз ерекшелік — ұйымның толық таратылуы. Жұмыс беруші сізді штаттың қысқаруына немесе лауазымға сәйкес келмеуіне байланысты жұмыстан шығара алмайды.

2. ЖЕҢІЛДЕТІЛГЕН ЕҢБЕК РЕЖИМІ ЖӘНЕ АУЫСТЫРУ

Егер сіздің жұмыс орныңыздағы жағдайлар талапқа сай болмаса, заң сіздің тарапыңызда (ҚР ЕК 44-бабы):

* Сізге зиянды және қауіпті өндірістік факторлардың әсерін толық болдырмайтын жеңіл жұмысқа ауысуға құқық беріледі.

* Жеңіл жұмысқа ауысқан кезде бұрынғы лауазымыңыз бойынша орташа жалақыңыз сақталады.

* Сіздің өтінішіңіз бойынша жұмыс беруші қысқартылған (толық емес) жұмыс уақытын белгілеуге міндетті.

3. ӘЛЕУМЕТТІК ТӨЛЕМДЕР МЕН ДЕМАЛЫСТАР

Әрбір жұмыс істейтін болашақ ана заңмен белгіленген демалысқа және мемлекет тарапынан әлеуметтік қолдауға құқылы (ҚР ЕК 99, 100-баптары):

* Жүктілікке және босануға байланысты ақылы демалысты рәсімдеу және біржолғы мемлекеттік жәрдемақы алу.

* Бала үш жасқа толғанға дейін бала күтіміне байланысты жалақы сақталмайтын демалыс алу және бала күтімі бойынша ай сайынғы әлеуметтік төлем алу.

ЖҮКТІ ӘЙЕЛДЕРГЕ НЕГЕ ҚАТАҢ ТЫЙЫМ САЛЫНАДЫ?

Жұмыс берушілердің жүкті әйелдерді төмендегі жұмыстарға тартуы ҚР заңнамасын бұзу болып табылады:

Ауыр жұмыстарға, сондай-ақ зиянды және қауіпті еңбек жағдайларындағы жұмыстарға (ҚР ЕК 44-бабы).

Түнгі жұмыстарға, үстеме жұмыстарға, демалыс және мереке күндеріндегі жұмыстарға (ҚР ЕК 76, 77-баптары).

Вахталық әдіспен жұмыс істеуге және олардың жазбаша келісімінсіз қызметтік іссапарларға жіберуге.

ҚҰҚЫҚТАРЫҢЫЗДЫ ҚОРҒАУ ҮШІН ҚАЙДА ЖҮГІНУ КЕРЕК?

Егер сіздің еңбек құқықтарыңыз бұзылса, жұмыс беруші қысым көрсетсе немесе заңда көзделген жеңілдіктерді беруден бас тартса, кеңес пен құқықтық көмек алу үшін бізге жүгініңіз.

Мекенжай: Петропавл қ., Абай көшесі, 64