Қарағанды облысы Полиция департаментінің Жауынгерлік және еңбек даңқы музейінде азаматтардың қауіпсіздігі мен тыныштығы үшін қызмет етіп жүрген тәртіп сақшыларына арналған тағылымды кездесу өтті. «Рақмет саған, полицей!» атты кеште қызметтік міндетін адал атқарып, адам өмірін құтқарған полицейлердің ерлігі дәріптелді. Іс-шара барысында Қарағанды қаласы патрульдік полиция полкінің қызметкерлері Ілияс Атбеков пен Магомед Якубовтың, сондай-ақ Бұқар жырау ауданы полиция басқармасының учаскелік полиция инспекторы Саят Жариковтың батыл әрекеттері ерекше атап өтілді. Алты қабаттан құлап кеткен үш жасар баланы құтқару оқиғасы алғашында күнделікті қызметтік рапорттардың бірінде ғана қысқаша көрсетілген болатын. Алайда бұл оқиғаның артында адам өмірін сақтап қалуға бағытталған шынайы ерлік жатты. Ілияс Атбеков пен Магомед Якубовтың кәсіби әрі жедел әрекетінің арқасында қайғылы жағдайдың алдын алу мүмкін болды. Кейін әлеуметтік желілерде жарияланған жазбаларда баланың ата-анасы мен көршілері полицейлерге шексіз алғыстарын білдіріп, олардың жанқиярлығын ерекше атап өтті. Ал учаскелік инспектор Саят Жариков үшін адам өмірін құтқару – қызметтік борышын орындаудың бір көрінісі ғана. Ол «102» арнасына түскен хабарлама бойынша жедел әрекет етіп, қажетті шараларды қабылдаған. Соның нәтижесінде әйел адамның өмірі аман қалды. Кейін бұл жағдайды зардап шеккен азаматшаның анасы да бейнеүндеу арқылы растады. Бұл оқиға нағыз ерліктің көбіне көпшілік назарынан тыс қалып жататынын тағы бір мәрте дәлелдеді. Кеш барысында айтылған «Барлық батырлар шапан кимейді» деген сөз тәртіп сақшыларының қызметін дәл сипаттайды. Өйткені олардың күнделікті жұмысы қауіп-қатермен бетпе-бет келуді, алғашқы көмек көрсетуді, өрт кезінде адамдарды құтқаруды және төтенше жағдайларда жедел шешім қабылдауды талап етеді. Әрбір жұмыс күні олар үшін жаңа сынақ әрі азаматтардың өмірі мен қауіпсіздігін қорғауға бағытталған жауапты миссия. Салтанатты шараның қорытындысында Қарағанды облысы Полиция департаменті бастығының орынбасары Талғат Мұғманов ерлік көрсеткен қызметкерлерді марапаттады. Ол тәртіп сақшыларының батылдығы, жанқиярлығы мен қызметтік борышқа адалдығы жоғары бағалауға лайық екенін атап өтті. Полицейлерге Қазақстан Республикасы Ішкі істер министрлігінің рәміздері бейнеленген естелік сағаттар табысталды. Бұл марапат – өз өмірін қатерге тігіп, өзгенің қауіпсіздігі үшін аянбай еңбек етіп жүрген қызметкерлерге көрсетілген құрмет пен шынайы ризашылықтың белгісі.
Ақпарат көзі : https://www.gov.kz/memleket/entities/mvd-karaganda/press/news/details/1243235?lang=ru
Жауап қалдыру