20 маусымнан бастап еліміздің барлық жоғары оқу орындарында қабылдау комиссиялары жұмысын бастайды. ҰБТ тапсырған және білім беру гранттары конкурсына қатысуды жоспарламаған талапкерлер 20 маусымнан бастап таңдалған жоғары оқу орындарына ақылы негізде оқуға түсу үшін құжаттарды тапсыра алады, деп хабарлайды ҚР Ғылым және жоғары білім министрлігі.
Білім беру грантын алуға үміткер үміткерлер үшін гранттар конкурсына қатысуға өтініштер қабылдау 2026 жылғы 13-20 шілде аралығында жүзеге асырылады. Осы кезеңде талапкерлер оқуды жалғастыруды жоспарлап отырған білім беру бағдарламалары мен жоғары оқу орындарын таңдай алады.
Білім беру гранттары конкурсына қатысуға өтініштерді қабылдау таңдалған жоғары білім беру ұйымына қарамастан жоғары оқу орындарының қабылдау комиссиялары арқылы жүзеге асырылады. Талапкерлерге ыңғайлы болу үшін ЖОО-ның Виртуалды қабылдау комиссиялары және eGov электрондық үкімет порталы арқылы онлайн-форматта өтініш беру мүмкіндігі де қарастырылған.
Қабылдау үшін ең төменгі шекті балл өзгеріссіз қалады. Ұлттық жоғары оқу орындарына түсудің шекті балы – 65 балл, басқа жоғары оқу орындарына түсудің шекті балы – 50 балл, “педагогикалық ғылымдар” білім беру саласы бойынша – 75 балл, “Денсаулық сақтау” білім беру саласы бойынша – 70 балл, “құқық” даярлау бағыты бойынша – 75 балл. Бұл ретте “Қазақстан тарихы” және ҰБТ – ның екі бейіндік пәні және (немесе) шығармашылық емтихан бойынша кемінде 5 балл, ал “оқу сауаттылығы” және “математикалық сауаттылық” пәндері бойынша кемінде 3 балл жинау қажет. Айта кету керек, жоғары оқу орындары білім беру бағдарламаларының топтары бойынша өздерінің шекті балдарын белгілей алады.
Мемлекеттік білім беру гранттары иегерлерінің тізімі 2026 жылғы 10 тамызға дейін жарияланады.
Жоғары оқу орындарына түсу үшін құжаттарды қабылдау 2026 жылдың 25 тамызына дейін жалғасады.
Ақпарат көзі : https://www.gov.kz/memleket/entities/kostanai-usunkol-uzinkol/press/news/details/1244204?lang=ru
Жауап қалдыру