Astana Invest фронт-офисінде Shenzhen Tianying Brothers UAV Innovation Co., Ltd. (ҚХР) және Astana Apex Group SPC Limited компанияларының өкілдерімен кездесу өтті
Оның аясында тараптар Астана аумағында бірлескен жобаларды іске асыру мүмкіндіктерін, сондай-ақ жоғары технологиялық өндіріс саласындағы ынтымақтастықты дамыту перспективаларын талқылады.
Astana Invest Басқарма төрағасының бірінші орынбасары Әуез Тыныбеков елорданың инвестициялық әлеуетін таныстырып, инвесторларды мемлекеттік қолдау шаралары, арнайы экономикалық аймақтарға қатысушылар үшін қарастырылған жеңілдіктер, сондай-ақ инвестициялық жобаларды «бір терезе» қағидаты бойынша сүйемелдеу тетіктері туралы баяндады.
Shenzhen Tianying Brothers UAV Innovation Co., Ltd. компаниясының акционерлер өкілі және бас директоры Чжао Цян кездесуге қатысушыларды компанияның қызметімен және өнеркәсіптік ұшқышсыз авиациялық жүйелерді әзірлеу мен өндіру, ұшуды басқару технологиялары, дрондарға қарсы шешімдер және радиоэлектрондық күрес құралдары саласындағы құзыреттерімен таныстырды. Компания 2015 жылы Шэньчжэнь қаласында құрылған және бүгінде өз өнімдерін әлемнің 20-дан астам еліне жеткізеді.
Кездесуге сондай-ақ Астана қаласының Инвестициялар және кәсіпкерлікті дамыту басқармасының инвестициялар тарту және сыртқы экономикалық қызмет бөлімінің бас маманы Жолдасбек Жүсіп, «Самұрық-Қазына Инвест» компаниясының инвесторлармен жұмыс жөніндегі департамент директоры Әділет Әбілқайыров, Astana Apex Group SPC Limited компаниясының құрылтайшысы Бақтархан Мырзабек қатысты.
Astana Apex Group SPC Limited — инвестициялық жобаларды құрылымдау және сүйемелдеуге, сондай-ақ Қазақстанда оларды іске асыру барысында серіктестердің мүдделерін ұсынуға маманданған арнайы мақсаттағы компания (SPC).
Кездесу қорытындысы бойынша тараптар өндірісті жергіліктендіру, технологиялар трансфері және бірлескен инвестициялық жобаларды іске асыру перспективаларын талқылады.
Ақпарат көзі : https://www.gov.kz/memleket/entities/astana-uir/press/news/details/1256735?lang=ru
Жауап қалдыру