Қазақстан Республикасы Атом энергиясы жөніндегі агенттігінің Атомдық қадағалау және бақылау комитетінің төрағасы Қазақстан Республикасы Атом энергиясы жөніндегі агенттігінің төрағасы Алмасадам Сәтқалиевтің Қытай Халық Республикасы Экология және қоршаған орта министрінің орынбасары, Қытайдың Ядролық қауіпсіздік жөніндегі ұлттық басқармасының (NNSA) басшысы Дун Баотунмен кездесуіне қатысты. Кездесу қазақстандық делегацияның Қытай Халық Республикасына жұмыс сапары аясында өтті.
Қазақстандық делегация құрамына сондай-ақ атом энергиясын пайдалану саласындағы мемлекеттік реттеу, нормативтік құқықтық актілер мен нормативтік-техникалық құжаттарды әзірлеу, техникалық реттеу, стандарттау, мемлекеттік сараптама және лицензиялау бағытында қызмет атқаратын мемлекеттік органдар мен бейінді ұйымдардың өкілдері кірді.
Келіссөздер барысында Қазақстан Республикасы мен Қытай Халық Республикасының реттеуші органдары арасындағы атом энергиясын бейбіт мақсатта пайдалану саласындағы ынтымақтастықты одан әрі дамыту, ядролық және радиациялық қауіпсіздік саласындағы өзара іс-қимылды нығайту, сондай-ақ МАГАТЭ-нің халықаралық стандарттары мен ұсынымдарын ескере отырып, мемлекеттік реттеу жүйесін жетілдіру мәселелері қаралды.
Атом электр станцияларын салу жобаларын іске асыру кезінде лицензиялау мен мемлекеттік қадағалау мәселелеріне, қауіпсіздікті реттеу саласындағы тәжірибе алмасуға, реттеуші органдардың ғылыми-техникалық қолдауын дамытуға, кадрлар даярлауға және сарапшылық әлеуетті нығайтуға ерекше назар аударылды.
Жұмыс сапары аясында Комитет төрағасы Қытайдың Ядролық қауіпсіздік жөніндегі ұлттық басқармасында (NNSA), Ядролық және радиациялық қауіпсіздік орталығында және NNSA-ның өңірлік бөлімшесінде болып, бейінді ұйымдардың өкілдерімен жұмыс кездесулерін өткізді. Кездесулер барысында реттеуші органдардың ғылыми-техникалық қолдауын дамыту, кадрлар даярлау, тәжірибе алмасу және Қазақстан Республикасы Атом энергиясы жөніндегі агенттігі мен NNSA арасындағы Өзара түсіністік туралы меморандумды іске асыру жөніндегі Жол картасын орындау мәселелері талқыланды.
Сонымен қатар, қазақстандық делегация Цзянсу провинциясында орналасқан Тяньвань атом электр станциясында болып, энергия блоктарын пайдалану үдерісімен, ядролық және радиациялық қауіпсіздікті қамтамасыз ету жүйесімен, пайдаланушы ұйымның қызметімен және атом электр станцияларын пайдаланудың заманауи тәсілдерімен танысты. Тяньвань АЭС – Қытайдағы ең ірі атом электр станцияларының бірі және III+ буынының заманауи энергия блоктарымен жабдықталған.
Комитеттің аталған іс-шараларға қатысуы шетелдік реттеуші органдармен халықаралық ынтымақтастықты дамытуға, мемлекеттік реттеудің озық тәжірибесін зерделеуге және Қазақстан Республикасында атом энергиясын пайдалану кезінде қауіпсіздіктің жоғары деңгейін қамтамасыз ету мақсатында ұлттық ядролық және радиациялық қадағалау жүйесін жетілдіруге бағытталған.
Кездесу қорытындысы бойынша тараптар атом энергиясын қауіпсіз пайдалану мәселелері бойынша екі елдің реттеуші органдары арасындағы практикалық ынтымақтастықты одан әрі дамытуға өзара мүдделілік танытатынын растады.
Ақпарат көзі : https://www.gov.kz/memleket/entities/atomic-control/press/news/details/1257383?lang=ru
Жауап қалдыру