Жаз мезгілінде ауа температурасының шамадан тыс көтерілуі адам денсаулығына кері әсер етуі мүмкін. Аптап ыстық кезінде ағза көп мөлшерде сұйықтық жоғалтады, нәтижесінде әлсіздік пайда болып, қан қысымы өзгеруі, күн өтуі немесе сусыздану қаупі артады. Сондықтан ыстық күндері өз денсаулығымызға ерекше көңіл бөліп, сақтық шараларын сақтау маңызды.
Ең алдымен, күннің ең ыстық уақыты – сағат 11:00 мен 17:00 аралығында ұзақ уақыт сыртта жүрмеуге тырысқан жөн. Егер сыртқа шығу қажет болса, ашық түсті, жеңіл әрі табиғи матадан тігілген киім киіп, міндетті түрде бас киім мен күннен қорғайтын көзілдірік таққан дұрыс. Бұл күн сәулесінің зиянды әсерін азайтып, дененің қызып кетуінен қорғайды.
Аптап ыстықта ағза көп сұйықтық жоғалтатындықтан, жеткілікті мөлшерде таза су ішу өте маңызды. Шөлдемеген жағдайда да аз-аздан су ішіп тұрған дұрыс. Ал тәтті газдалған сусындар, кофе мен алкогольді шектеу қажет, өйткені олар ағзаның сусыздануын күшейтуі мүмкін.
Тамақтану тәртібіне де назар аудару керек. Ыстық күндері майлы және ауыр тағамдардың орнына көкөніс, жеміс-жидек, айран, салқын сорпа сияқты жеңіл әрі дәруменге бай тағамдарды тұтынған жөн. Мұндай тағамдар ағзаның күш-қуатын сақтап, ас қорыту жүйесіне салмақ түсірмейді.
Үй ішінде де салқындықты сақтау маңызды. Күндіз күн сәулесі тікелей түсетін терезелерді пердемен жауып, таңертең және кешке бөлмені желдеткен дұрыс. Мүмкіндік болса, желдеткіш немесе кондиционерді пайдалану пайдалы. Сонымен қатар ауыр дене еңбегі мен спорттық жаттығуларды таңертең ерте немесе кешкі салқын уақытта орындаған жөн.
Аптап ыстық кезінде балалар, қарт адамдар және созылмалы ауруы бар жандар ерекше күтімді қажет етеді. Олардың жағдайын жиі бақылап, жеткілікті су ішіп жүргеніне көз жеткізу керек.
Егер адамның басы айналып, жүрегі айнып, дене қызуы көтерілсе немесе есінен тана бастаса, бұл күн өтудің белгілері болуы мүмкін. Мұндай жағдайда оны дереу көлеңкеге немесе салқын жерге апарып, киімін босатып, су беріп, денесін салқындату қажет. Егер жағдайы жақсармаса, жедел медициналық көмек шақырған дұрыс.
Аптап ыстықтан қорғану үшін қарапайым қауіпсіздік ережелерін сақтау жеткілікті. Уақытылы су ішу, күн сәулесінен қорғану, дұрыс киіну және денсаулыққа мұқият қарау – ыстық күндерді қауіпсіз әрі жайлы өткізуге көмектеседі.
Ақпарат көзі : https://www.gov.kz/memleket/entities/departament-kkbtu-zhambyl/press/news/details/1259501?lang=ru
Жауап қалдыру