Маңғыстау облысы Қарақия ауданының рухани және мәдени өмірінде ерекше орны бар Аудандық орталық мешітін жаңғырту мен көркейтуге бағытталған кешенді жөндеу жұмыстары мәресіне жақындап қалды. Жалпы құны 17 миллион теңгені құрайтын бұл маңызды әлеуметтік және инфрақұрылымдық жобаны отандық мердігер-«Алиев» жеке кәсіпкерлігі жүзеге асыруда. Құрылыс-жаңғырту шаралары барысында ғимараттың ішкі-сыртқы келбетін заман талабына сай үйлестірумен қатар, аумақты абаттандыру мәселесіне де басымдық берілді. Бұл жұмыстар жергілікті тұрғындар мен құлшылық үйіне келуші жамағат үшін қолайлы әрі қауіпсіз орта қалыптастыру мақсатында жүйелі түрде атқарылып жатыр.
Жоба аясында мешіт маңындағы инфрақұрылым толықтай жаңартылып, жаяу жүргіншілерге арналған арнайы жол салынды және заманауи брусчатка тақташалары төселді. Сонымен қатар, аумақтың эстетикалық тартымдылығын арттыру және түнгі уақыттағы қауіпсіздікті қамтамасыз ету мақсатында арнайы декоративті әсемдеуіш жарық шамдары орнатылды. Сәулеттік кешеннің тұтастығын сақтау үшін мешіт ауласының қоршаулары да сапалы сылақтан өтіп, толықтай сырланды. Қазіргі таңда құрылысшылар ғимараттың басты сәулеттік элементі болып табылатын мешіт күмбезін сырлау және қалпына келтіру бойынша қорытынды кезеңдегі жұмыстарды атқаруда.
Қарақия ауданы әкімдігінің баспасөз қызметі
Ақпарат көзі : https://www.gov.kz/memleket/entities/akimat-karakiya/press/news/details/1260446?lang=ru
Жауап қалдыру