Жаза емес – жаңа өмірге мүмкіндік. Алматыда республикалық «Жаңа жол» акциясы жалғасуда. Оның аясында полиция қызметкерлері профилактикалық есепте тұрған азаматтардың қоғамға қайта бейімделуіне жан-жақты қолдау көрсетіп келеді.
Жергілікті атқарушы органдармен бірлесіп, полицейлер есепте тұрған азаматтарды әлеуметтік бейімдеуге бағытталған кешенді жұмыстар жүргізуде. Негізгі бағыттардың бірі – жұмысқа орналастыруға жәрдемдесу. Азаматтарға бос жұмыс орындары ұсынылып, еңбекке орналасу мәселелері бойынша кеңес беріледі, сондай-ақ жұмыспен қамту орталықтарына жүгінуге және қажетті қолдау алуға көмек көрсетіледі.
Акцияның басты мақсаты – құқық бұзушылықтың қайталануына жол бермеумен қатар, азаматтардың қоғамға қайта оралуына нақты жағдай жасау. Тұрақты жұмыс, тұрақты табыс және әлеуметтік қолдау адамның қайтадан заң бұзу қаупін едәуір төмендетеді.
«Біздің ұстанымымыз – профилактика тек бақылаумен шектелмеуі керек. Ең алдымен, адамға қолдау көрсету маңызды. Азаматтың жұмысқа орналасып, қоғамдағы орнын қайта табуына мүмкіндік беру – оның заңға бағынатын өмірге оралуындағы маңызды қадам. Республикалық «Жаңа жол» акциясының негізгі мақсаты да осы. Бұл жұмыс Мемлекет басшысының «Заң және тәртіп» қағидаты аясында жүзеге асырылып келеді», – деді Алматы қаласы Полиция департаменті Қоғамдық қауіпсіздік басқармасының бастығы Тимур Ноғайбаев.
Полицияда табысты әлеуметтік бейімдеу – тек бір адамның тағдырын өзгерту ғана емес, тұтас қоғамның қауіпсіздігіне қосылған үлес екенін атап өтті. «Жаңа жол» акциясы қоғамдық қауіпсіздікті нығайтуға, қайталанатын қылмыс деңгейін төмендетуге және өмірін жақсы жаққа өзгерткісі келетін азаматтарға нақты қолдау көрсетуге бағытталған.
Ақпарат көзі : https://www.gov.kz/memleket/entities/mvd-almaty/press/news/details/1265428?lang=ru
Жауап қалдыру