Астана қаласының прокуратурасы мемлекеттік органдармен бірлесіп, «Қамқорлық пен Заң» әлеуметтік жобасы аясында ауқымды Ашық есік күнін өткізді. Іс-шара халықтың әлеуметтік осал санаттарына жататын азаматтарға қолдау көрсету мақсатында ұйымдастырылды, деп хабарлайды елорда әкімдігінің ресми сайты.
«Бүгін Астана қаласының прокуратурасы мемлекеттік органдармен бірлесіп, «Қамқорлық пен Заң» жобасы аясында халықтың әлеуметтік осал санаттарына жататын азаматтарға арналған Ашық есік күнін өткізіп жатыр. Іс-шараның басты мақсаты – әрбір азаматтың мәселесін мұқият тыңдап, оның заңды құқықтары мен мүдделерін қорғауға жәрдемдесу, сондай-ақ туындаған мәселелерді шешу тәртібін түсіндіру», – деді Астана қаласы прокуратурасы басқармасының прокуроры Арайлым Оразова.
Елорда тұрғындары бюрократиялық рәсімдер мен жауап күтпей-ақ өз мәселелерін жауапты мамандарға тікелей жеткізуге мүмкіндік алды.
«Жанұя» орталығында прокуратура, полиция, денсаулық сақтау, білім беру, халықты әлеуметтік қорғау салаларының мамандары және тұрғын үй мәселелері бойынша жауапты қызметкерлер бір мезгілде қабылдау жүргізді.
«Әлеуметтік қорғау, зейнетақымен қамсыздандыру, мүгедектікті белгілеу, оңалтудың техникалық құралдарымен қамтамасыз ету, әлеуметтік төлемдерді алу, тұрғын үй құқықтары, сот шешімдерін орындау, еңбек қатынастары және азаматтар күнделікті өмірде жиі кездесетін өзге де мәселелерге ерекше көңіл бөлінеді. Біздің жұмысымыздың басты қағидаты өзгермейді – адам құқықтарын қорғау, заңдылықты қамтамасыз ету және бұзылған құқықтарды қалпына келтіру», – деді Арайлым Оразова.
Мұндай «бір терезе» қағидаты бойынша ұйымдастырылған кездесулер қадағалау және мемлекеттік органдарға азаматтардың өтініштеріне жедел ден қоюға әрі құқықтық көмекке мұқтаж адамдарға нақты қолдау көрсетуге мүмкіндік береді.
#законипорядок #заңментәртіп
Ақпарат көзі : https://www.gov.kz/memleket/entities/astana/press/news/details/1266628?lang=ru
Жауап қалдыру