Қауіпсіз демалыс – ата-ана назарынан басталады: ШҚО полицейлері ата-аналарға балалар қауіпсіздігін ескертті
Жазғы демалыс – балалардың ойнап, тынығатын кезі. Алайда осы кезеңде олар ересектердің тұрақты бақылауынсыз қалуы мүмкін. Осыған байланысты Шығыс Қазақстан облысының полицейлері Өскемен қаласындағы Базовая көшесіндегі аулалардың бірінде профилактикалық кездесу өткізді.
Полиция қызметкерлері тұрғындармен әңгімелесіп, ақпараттық жадынамалар таратты. Ата-аналарға балалар үшін жиі кездесетін қауіп-қатерлер, соның ішінде ашық терезелер, су айдындары, аула аумақтары мен ойын алаңдарындағы қауіпсіздік мәселелері түсіндірілді.
Полицейлер балаларға да қауіпсіздік ережелерін еске салды. Бейтаныс адамдармен сөйлеспеу, бөгде адамдармен бірге кетпеу, жүрген жері туралы ата-анасына хабарлап отыру және көшеде ойнау кезінде сақтық шараларын сақтау қажеттігі айтылды.
Ата-аналар есте ұстағаны жөн: баланың қауіпсіздігі тыйым салудан емес, тұрақты назар мен қамқорлықтан басталады. Баланы қараусыз қалдырмау, оның кіммен және қайда жүргенін білу, қауіпсіздік ережелерін үнемі түсіндіріп отыру – келеңсіз жағдайлардың алдын алуға көмектесетін қарапайым шаралар.
ШҚО Полиция департаментінде атап өткендей, балалар мен ата-аналарға арналған профилактикалық жұмыстар «Заң мен тәртіп» қағидаты аясында тұрақты түрде жүргізіледі.
Мұндай кездесулердің басты мақсаты – ықтимал қауіптердің алдын алып қана қоймай, балалар мен ересектердің өз қауіпсіздігіне жауапкершілікпен қарауын қалыптастыру. Кейде уақытында айтылған бір ауыз ескерту мен ата-ананың назары қайғылы жағдайдың алдын алуы мүмкін.
ШҚО ПД баспасөз қызметі
Ақпарат көзі : https://www.gov.kz/memleket/entities/mvd-vko/press/news/details/1271163?lang=ru
Жауап қалдыру