Қызылжар ауданының әкімі Бейбіт Исмановтың төрағалығымен әкімдік отырысы өтті. Күн тәртібінде ауданның әлеуметтік-экономикалық дамуы және білім беру ұйымдарының 2026-2027 оқу жылына дайындығы мәселелері қаралды.
Алғашқы мәселе бойынша 2026 жылғы қаңтар-шілде айларындағы ауданның әлеуметтік-экономикалық даму көрсеткіштері қаралды. Ауыл шаруашылығы, өнеркәсіп, сауда және құрылыс салаларында оң динамика қалыптасқаны атап өтілді.
Ағымдағы жылдың жеті айында ауыл шаруашылығының жалпы өнім көлемі 30,1 млрд теңгені құрап, нақты көлем индексі 109%-ды көрсетті. Ауыл шаруашылығы өнімінің көлемі бойынша Қызылжар ауданы облыста бірінші орында. Өнеркәсіп өндірісінің көлемі 22,6 млрд теңгеге, құрылыс жұмыстарының көлемі 7,8 млрд теңгеге жетті. Негізгі капиталға салынған инвестициялар көлемі 19,1 млрд теңгені құрады.
Қаңтар-тамыз айларына күтілетін көрсеткіштерге де ерекше назар аударылды. Жауапты мемлекеттік органдарға инвестиция тарту, құрылыс жұмыстары және тұрғын үйді пайдалануға беру бойынша жоспарлы көрсеткіштердің орындалуын қамтамасыз ету міндеттері қойылды.
Отырыста қаралған екінші мәселе – ауданның білім беру ұйымдарының жаңа оқу жылына дайындығы.
2026-2027 оқу жылында ауданның 39 мектебінде 6 354 оқушы білім алады деп күтілуде, оның ішінде 539 бала бірінші сыныпқа барады. Мектепке дейінгі білім беру ұйымдарына 1 267 бала қамтылған. Сонымен қатар балабақшаларда қосымша орындарға қажеттілік сақталуда. Қазіргі таңда 2-6 жас аралығындағы 111 бала кезекте тұр.
Жаңа оқу жылына дайындық аясында мектептер мен балабақшаларда ағымдағы жөндеу жұмыстары жүргізіліп, жылыту маусымына көмір мен отын сатып алынды. Білім беру ұйымдарының материалдық-техникалық базасын нығайту және жөндеу жұмыстарын жүргізуге тиісті қаражат қарастырылған. Атап айтқанда, Соколов орта мектебінде екі жылға жоспарланған күрделі жөндеу жұмыстары жалғасуда. Подгорное негізгі мектебінде ағымдағы жөндеу жүргізіліп, Шахов орта мектебінің шатыры жөнделуде.
Балалардың қауіпсіздігіне, мектептегі тамақтандыруға және оқушыларды тасымалдауға ерекше көңіл бөлінді. Білім беру ұйымдарында бейнебақылау жүйелері, дабыл түймелері, турникеттер және тексеру құралдары орнатылған. Жаңа оқу жылында 3 317 оқушыны тегін ыстық тамақпен қамту жоспарлануда. Ауылдық елді мекендерден білім беру ұйымдарына балаларды тасымалдау ұйымдастырылған.
Отырыс қорытындысы бойынша жауапты басшыларға ауданның әлеуметтік-экономикалық даму көрсеткіштерінің орындалуын қамтамасыз ету, сондай-ақ жаңа оқу жылында балалардың қауіпсіз әрі сапалы білім алуына қажетті жағдайларды қамтамасыз ету жөнінде нақты тапсырмалар берілді.
Ақпарат көзі : https://www.gov.kz/memleket/entities/sko-kyzylzhar/press/news/details/1276453?lang=ru
Жауап қалдыру