Алматыда Орталық Азияның жас көшбасшылары жасанды интеллект және тұрақты даму саласындағы жобаларын таныстырды

Алматыда Қазақстан мен Орталық Азия елдерінің жас көшбасшыларын біріктірген Almaty Youth Forum 2026 халықаралық жастар форумы өтті. Форумның басты тақырыптары жасанды интеллект, климаттық технологиялар, цифрлық қауіпсіздік, волонтерлік және әлеуметтік инновациялар болды.

Форум Тұрақты даму мақсатындағы Халықаралық волонтерлер жылы аясында Алматы қаласының әкімдігі, Қазақстандағы БҰҰ Балалар қоры (ЮНИСЕФ) және Алматы волонтерлерінің Фронт-офисінің ұйымдастыруымен өтті.

«Бүгінде жастар үшін идеялар нақты жобаларға айналатын, ал бастамалар мемлекет, халықаралық ұйымдар мен бизнес тарапынан қолдау табатын орта қалыптастыру аса маңызды. Almaty Youth Forum Қазақстан мен Орталық Азия жастарын тұрақты даму мен волонтерліктің ортақ құндылықтары төңірегінде біріктіретін дәл осындай алаңға айналды», – деді Алматы қаласы Жастар саясаты басқармасының басшысы Азиз Қажденбек.

Екі күндік форум бағдарламасына панельдік пікірталастар, практикалық воркшоптар, сондай-ақ жасанды интеллект, қаржылық сауаттылық, тұрақты даму және инвестициялар саласындағы сарапшылардың баяндамалары кірді.

Форумның негізгі оқиғаларының бірі – әл-Фараби атындағы Қазақ ұлттық университетінің базасында UNICEF Zhastary Hub орталығын құру туралы хабарлануы болды. ЮНИСЕФ пен университет арасында ынтымақтастық туралы меморандумға қол қойылды. Жаңа хаб волонтерлікті және жастар бастамаларын дамытуға арналған алаңға айналды.

Бағдарламада жастар жобаларының көрмесіне де ерекше орын берілді. Қазақстан мен Қырғызстаннан келіп түскен 211 өтінімнің ішінен 29 бастама финалға өтті. Олардың қатарында жасанды интеллект пен спутниктік деректерді пайдалана отырып, мұздық көлдердің жарылу қаупін алдын ала ескертетін GLOFcast жүйесі, өнеркәсіптік кәсіпорындардағы қауіпсіздікті арттыруға арналған Samruq.AI жобасы және автокөліктерден шығатын зиянды қалдықтарды азайтуға бағытталған EcoTube жобасы болды.

11 тамызда форум Almaty Museum of Arts орталығымен серіктестікте жалғасты. Қатысушылар үшін шығармашылық сессиялар, пікірталастар және жастар жобалары байқауының финалы өтті. Он команда өз әзірлемелерін сарапшылар алқасына таныстырды, ал үздік жобалар бастамаларын одан әрі дамыту үшін менторлық қолдауға ие болды.

Ақпарат көзі : https://www.gov.kz/memleket/entities/jasalmaty/press/news/details/1276441?lang=ru