Ақтөбе қаласында тәрбие-психологиялық жұмыс, өскелең ұрпақтың құқықтық мәдениетін, азаматтық жауапкершілігін және ұлттық құндылықтарын қалыптастыру мәселелеріне арналған облыстық форум өтті.
Форумға офлайн форматта білім беру жүйесінің 400-ге жуық маманы қатысып, тағы 500-ге жуық қатысушы онлайн қосылды. Олардың қатарында тәрбие жұмысы жөніндегі директор орынбасарлары, әдіскерлер, сынып жетекшілері, педагог-психологтер, әлеуметтік педагогтер және кәмелетке толмағандар істері жөніндегі учаскелік полиция инспекторлары болды.
Талқылаудың негізгі тақырыбы — өңірдің білім беру жүйесіндегі тәрбие жұмысының алдағы басымдықтарын айқындау. Қатысушылар тәрбиені мектеп жұмысының жеке бір бағыты ретінде ғана емес, сабақ мазмұны мен жобалардан бастап, оқушылардың мінез-құлқы мен өзара қарым-қатынасына дейінгі күнделікті білім беру ортасының ажырамас бөлігі ретінде қалыптастыру жолдарын қарастырды.
🇰🇿 Форумда «Адал азамат» біртұтас тәрбие бағдарламасын, «Заң мен тәртіп» және «Таза Қазақстан» қағидаттарын іске асыруға, қауіпсіз білім беру ортасын қалыптастыруға, балалар мен педагогтердің психологиялық әл-ауқатын қамтамасыз етуге, сондай-ақ мектеп, отбасы және кәсіби қоғамдастық арасындағы өзара байланысты нығайтуға ерекше назар аударылды.
Ақпарат көзі : https://www.gov.kz/memleket/entities/aktobe-bilim/press/news/details/1278391?lang=ru
Жауап қалдыру