«Қазақстан медицинасы күндері» шеңберінде 26 тамызда Душанбеде академик Н.Ж. Батпенов атындағы Ұлттық ғылыми травматология және ортопедия орталығының (ҰҒТОО) мамандары «Истиклол» медициналық ұйымының базасында күрделі хирургиялық операциялар жасап, ондаған пациентті қабылдады. Күннің негізгі операцияларының бірі – 13 жастағы пациентке IV дәрежелі сколиозға хирургиялық түзету жүргізу болды. Операцияны академик Батпенов атындағы ҰҒТОО Омыртқа патологиясы орталығының жетекшісі Сейдалы Абдалиев және Омыртқа жарақаты бөлімшесінің меңгерушісі Мұрат Байдарбеков тәжікстандық әріптестерімен бірлесіп орындады. Тағы бір күрделі операция жол-көлік оқиғасынан зардап шеккен 37 жастағы пациентке жасалды. Пациентте ауыр қосарлас жарақат: жамбас сүйектерінің зақымдануы, сол жақ жамбас сүйегі басының орталық шығуы, оң жақ сирақ сүйегінің сынуы және оң аяқтың асық сүйегінің шығуы анықталған. Өмірлік көрсетілімдер бойынша асық сүйегінің шығуын орнына салу және оң жақ сирақ сүйегіне остеосинтез жасалды. Операцияны Қайрат Тәжин әріптестерімен бірлесіп орындады. Хирургиялық жұмыстардан бөлек, қазақстандық мамандар нейрохирургия бөлімінде пациенттерді аралап көріп, омыртқа аурулары мен жарақаттарының салдары бар, сондай-ақ ортопедиялық патологиялары бар пациенттерге амбулаториялық қабылдау жүргізді. Бір күннің ішінде ҰҒТОО мамандары стационарда 23 пациентті қарап, амбулаториялық қабылдау барысында 67 пациентке консультация берді. Жұмыс тәжікстандық мамандармен тәжірибе алмасудың тікелей форматы арқылы жүргізілуде. Бірлескен жұмыс барысында дәрігерлер күрделі жағдайларды емдеу тактикасын және травматология мен ортопедиядағы заманауи тәсілдерді талқылауда. Душанбеде «Қазақстанның медицинасы күндері» жалғасуда. 27 тамызға жаңа операциялар, консультациялар және білім беру іс-шаралары жоспарланған.
Ақпарат көзі : https://www.gov.kz/memleket/entities/dsm/press/news/details/1280738?lang=ru
Жауап қалдыру