«Таза Қазақстан» жалпыұлттық экологиялық акциясы аясында және «Заң мен тәртіп» қағидатын іске асыру мақсатында Солтүстік Қазақстан облысында 94 мобильді топ жұмыс істейді. Олар стихиялық қоқыс орындарын анықтау бойынша 2 мыңнан астам рейдтік іс-шара өткізді. Сонымен қатар Экология департаменті және Табиғи ресурстар басқармасы мамандарымен бірлесіп жұмыс тобы құрылып, проблемалы учаскелерге 41 рет шығу нәтижесінде қоқысты белгіленбеген жерге тастаудың 270-тен астам фактісі анықталды.
Профилактикалық жұмыс үздіксіз жүргізілуде. 2024 жылғы сәуірден бастап бүгінгі күнге дейін полиция қызметкерлері 38 мыңнан астам әкімшілік құқық бұзушылықты анықтады. Оның 4 624-і қоғамдық орындарды ластауға, ал 33 678-і қалалар мен елді мекендерді абаттандыру қағидаларын бұзуға қатысты.
Бұл ретте тәртіп сақшылары «Заң мен тәртіп» қағидатын жеке үлгі арқылы көрсетудің маңызы зор деп санайды. Ведомство қызметкерлері қызмет атқаратын ғимараттардың айналасын ретке келтіру үшін тұрақты түрде сенбіліктерге шығады.
29 тамызда кезекті сенбілікке полиция департаментінің барлық қызметтері қатысты. Тергеушілер, анықтаушылар, жедел уәкілдер мен байланыс инженерлері Қазақстан Конституциясы көшесі, 51 мекенжайындағы әкімшілік ғимараттың маңындағы тротуарларды сыпырып, көгалдарды тазалады. Штаб және облыстық департамент аппаратының басқа да бөлімшелерінің қызметкерлері Қазақстан Конституциясы көшесі, 70 мекенжайындағы ғимараттың айналасын ретке келтірді. Сонымен қатар Алматы, Володарский, Жұмабаев көшелеріндегі және басқа да полиция нысандарының аумағында жиектерді әктеу, тазалық жұмыстарын жүргізу және көгалдарды абаттандыру жұмыстары атқарылды.
Осылайша тәртіп біртіндеп қалыптасады: ол тек бақылау мен жауапкершілік арқылы ғана емес, күнделікті еңбек пен жеке үлгі арқылы да орнығады. Бұл – «Таза Қазақстан» мен «Заң мен тәртіп» қағидаттарының іс жүзіндегі мазмұны.
Ақпарат көзі : https://www.gov.kz/memleket/entities/mvd-sko/press/news/details/1282352?lang=ru
Жауап қалдыру