Ата-анасының мейірімі мен қамқорлығынан тыс қалған балаларды қолдау жөніндегі Өңірлік орталықтың тәрбиеленушілері үшін 1 қыркүйек жаңа оқу жылының басталуы ғана емес, жарқын спорттық мерекенің де бастауы болды!
Павлодар облысы Полиция департаментінің қызметкерлері «Ақ Барс» МФК қолдауымен балаларға арнап футбол турнирін ұйымдастырып, оларға көтеріңкі көңіл-күй, спорттық тартыс пен ұмытылмас эмоциялар сыйлады.
Футбол алаңында балалар допқа таласып, гол соғып, бір-біріне жанкүйер болды. Спорттық мереке тәрбиеленушілерге өз қабілеттерін көрсетуге, жағымды эмоциялармен қуаттануға және бұл күнді достық пен қолдау атмосферасында өткізуге мүмкіндік берді.
Орталықтың ең кішкентай тәрбиеленушілеріне Павлодар қаласы ПБ ҚҚБ ювеналды полиция тобының аға инспекторы, полиция подполковнигі Руслан Сүлейменов боямақ кітапшаларын табыстады. Олар балаларға жолда және қоғамда қауіпсіз жүріс-тұрыс ережелерін ойын түрінде әрі түсінікті тілмен үйренуге, сондай-ақ сақтықты қажет ететін жағдайларға назар аударуға көмектеседі.
Спорттық жарыстардан кейін балаларды шай дастарханы мен «Додо Пицца» пиццериялар желісінен дәмді әрі хош иісті пицца күтті.
Сол күні Павлодар облысы Полиция департаментінің қызметкерлері Облыстық балалар психоневрологиялық әлеуметтік қызмет көрсету орталығына да барды. Мекемеде тәрбиеленіп жатқан балаларға қауіпсіздік тақырыбындағы боямақ кітапшалары табысталды. Мұндай формат балаларға маңызды ережелер мен жеке қауіпсіздік негіздерін өздеріне түсінікті әрі қолжетімді түрде меңгеруге мүмкіндік береді.
– Біз үшін бірде-бір баланың назардан тыс қалмауы маңызды. Баланың қай жерде тәрбиеленіп жатқанына және қай жерде жүргеніне қарамастан, әрқайсысы қамқорлыққа, қолдауға және өзінің қауіпсіздігін қамтамасыз етуге көмектесетін қолжетімді ақпаратқа құқылы. Балалармен ерте жастан бастап қоғамдағы ықтимал қауіптер, қауіпсіз жүріс-тұрыс ережелері және түрлі жағдайларда қалай әрекет ету керектігі туралы сөйлесу аса маңызды. Біздің ортақ міндетіміз – әрбір баланың өзін қорғалған сезінуіне, өз құқықтарын білуіне және жеке қауіпсіздігін қалай сақтау керектігін түсінуіне жағдай жасау, – деп атап өтті Павлодар облысы ПД есірткі қылмысына қарсы күрес басқармасының аға жедел уәкілі Ирина Тимиргалиев.
Павлодар облысы Полиция департаменті барша оқушылар мен студенттерге жаңа оқу жылында табыс, жарқын жеңістер мен жаңа жетістіктер тілейді! Заңдарды құрметтеу, ережелерді сақтау және қауіпсіздікке жауапкершілікпен қарау «Заң мен тәртіп» тұжырымдамасының негізгі қағидаттарына айналсын!
Ақпарат көзі : https://www.gov.kz/memleket/entities/mvd-pavlodar/press/news/details/1284117?lang=ru
Жауап қалдыру