ШҚО Полиция департаментінде Қазақстан халқының тілдері күні аталып өтті
Қазақстан халқының тілдері күні қарсаңында Шығыс Қазақстан облысы Полиция департаментінің мұражайында тіл мәдениетіне, ұлттық дәстүрлер мен қоғамымыздың бірлігін айқындайтын құндылықтарға арналған мерекелік іс-шара өтті.
Қазақстан халқының тілдері күні – еліміздегі барлық этностардың тілі мен мәдениетіне деген құрметті дәріптеуге, тарихи және рухани мұраны сақтауға, өзара түсіністік пен қоғамдық келісімді нығайтуға мүмкіндік беретін маңызды мереке.
Полиция қызметкерлері үшін сөйлеу мәдениеті мен өзара сыйластыққа негізделген қарым-қатынастың маңызы ерекше. Күнделікті қызмет азаматтармен тығыз байланыста өтетіндіктен, сауатты әрі әдепті диалог құра білу кәсіби мәдениеттің маңызды бөлігі болып табылады.
Іс-шараны ШҚО ПД бастығының орынбасары, полиция полковнигі Серік Манапов ашып, қызметкерлерді келе жатқан мерекемен құттықтады. Салтанатты бөлім барысында қазақ тіліндегі қызметтік құжаттардың сапасын арттыруға үлес қосқан департамент бөлімшелерінің қызметкерлері алғыс хаттармен және грамоталармен марапатталды.
Сондай-ақ Полиция департаментіне әдістемелік қолдау көрсетіп, қызметкерлерге сабақтар өткізетін Шығыс Қазақстан облыстық лингвистикалық орталығының жұмысы атап өтілді. Орталықтың директоры Әсемгүл Абзалова ұжымды мерекемен құттықтап, тіл мәдениетіне көңіл бөліп, білім беру бастамаларын қолдағаны және жемісті ынтымақтастық үшін алғысын білдірді.
Іс-шара аясында қазақ тілі, тарихы мен мәдениетіне арналған кітап көрмесі ұйымдастырылып, сондай-ақ Департамент қызметкерлері дайындаған бейнероликтер көрсетілді. Бағдарламаның соңында «Кім білгір?» зияткерлік ойыны өткізіліп, полицейлер тіл, тарих, ұлттық дәстүрлер мен салт-ғұрыптар жөніндегі білімдерін сынады.
Мерекелік кездесу қызметкерлердің білімін толықтырып қана қоймай, елдің мәдени мұрасына назар аударуға мүмкіндік берді. Сонымен қатар қызметтік қызмет барысында өзара сыйластыққа негізделген қарым-қатынас пен кәсіби мәдениеттің маңызын айқындады.
ШҚО ПД баспасөз қызметі
Ақпарат көзі : https://www.gov.kz/memleket/entities/mvd-vko/press/news/details/1285223?lang=ru
Жауап қалдыру