Қарағанды облысы Ақтоғай ауданының тұрғындары бейінді мамандардың консультациясын бұрынғыдан да қолжетімді түрде ала алады. Осы мақсатта ауданда телемедицина дамып келеді. Енді тұрғындар облыс орталығына бармай-ақ, медициналық көмекті қашықтан ала алады.
Жұмыс сапары барысында ҚР Денсаулық сақтау вице-министрі Манас Рамазанов ауданның медициналық ұйымдарының жұмысымен танысып, ауылдық жерлердегі медициналық көмектің қолжетімділігін тексерді.
Вице-министр Үшарал ауылының медициналық пункті мен Ақтоғай аудандық ауруханасына барды. Ол медициналық көмектің қалай ұйымдастырылғанын және тұрғындарға қандай жағдайда көрсетілетінін көрді.
Басты мәселелердің бірі – телемедицинаны дамыту. Аудандық ауруханада Манас Рамазановқа мамандардың қашықтан консультация беру тәртібі көрсетілді. Мұндай формат жергілікті дәрігерлерге науқасты облыс орталығына жібермей-ақ, басқа медициналық ұйымдардағы әріптестерінен сараптамалық кеңес алуға мүмкіндік береді.
– Ауыл тұрғыны үшін қажетті медициналық көмектің тұрғылықты жеріне барынша жақын жерде қолжетімді болуы маңызды. Заманауи технологиялар, оның ішінде телемедицина мамандардың консультациясын пациентке жақындатуға және аудандық медицинаның мүмкіндіктерін арттыруға мүмкіндік береді, – деді Манас Рамазанов.
Сапар барысында вице-министр Ақтоғай ауданының тұрғындарымен де кездесті.
Олар медициналық қызмет көрсетуге қатысты мәселелерін айтып, өз ұсыныстарын жеткізді. Сонымен қатар Манас Рамазанов азаматтарды жеке қабылдады.
Тұрғындардың өтініштері бойынша мамандар түсініктеме берді. Қосымша қарауды қажет ететін мәселелер бақылауға алынды.
ҚР Денсаулық сақтау министрлігінің мәліметінше
Ақпарат көзі : https://www.gov.kz/memleket/entities/karaganda/press/news/details/1289707?lang=ru
Жауап қалдыру