Орындықтардан ұлттық ыдыс-аяққа дейін: Абай облысындағы мекемеде өндіріс көлемі кеңейтілуде

Абай облысы бойынша ҚАЖ мекемесінде өндіріс көлемі кеңейтілуде. Жиһаз құрастыру және ағаш ұсталық бұйымдарын жасау цехында жаңа бағыт — кафе мен мейрамханаларға арналған орындықтар өндірісі іске қосылды.

Цехтың жұмыс істеп келе жатқанына небәрі бірнеше ай болғанына қарамастан, оның өнімдеріне сұраныс артып келеді. Алматы және Астана қалаларынан кафе мен мейрамханаларға арналған орындықтар дайындауға тапсырыстар түскен.

Мұнда айына орта есеппен 700–800 орындық жасалады. Сонымен қатар цехта 1000-ға дейін ұлттық ыдыс-аяқ бұйымдары және зергерлік бұйымдарды сақтауға арналған шамамен 100 сандық дайындалады.

Бүгінде өндірістік цехта 90-ға жуық сотталған еңбек етеді. Алдағы уақытта жұмыс орындарының санын 150 адамға дейін арттыру жоспарлануда.

Сотталғандардың еңбекақысы атқарылған жұмыстың көлеміне тікелей байланысты кесімді түрде төленеді. Еңбекпен тапқан қаражат сот шешімімен белгіленген талап-арыз бойынша міндеттемелерді өтеуге бағытталады. Сонымен қатар бұл қаражат сотталғандарға өз отбасылары мен жақындарына материалдық көмек көрсетуге мүмкіндік береді.

— Мен 43 жастамын, Алматы қаласының тұрғынымын. Үш жыл бұрын ұрлық жасағаным үшін бес жылға бас бостандығынан айырылдым. Қазір өндірістік цехта жұмыс істеймін. Мен үшін осында жүріп еңбек етуге, табыс табуға және отбасыма көмектесуге мүмкіндік берілгені маңызды. Үйде мені жұбайым мен кәмелетке толмаған үш балам күтіп отыр. Жақындарыма қолдау көрсету үшін адал еңбек етуге тырысамын. Бостандыққа шыққаннан кейін отбасыма оралып, жұмыс істеп, өмірімді қайта бастағым келеді, — деді сотталған азамат.

— Бүгінде мекемеде төрт жеке кәсіпкерлік және екі жауапкершілігі шектеулі серіктестік жұмыс істейді. Ағаш өңдеу, тігін және жиһаз цехтары, сусын өндіру цехы, сондай-ақ жақында іске қосылған шаруашылық сабын өндіру цехы жұмыс істеп тұр. Жаңа өндіріс небәрі бірнеше ай бұрын іске қосылғанына қарамастан, Алматы мен Астана қалаларынан тапсырыстар тартуға қол жеткіздік. Бұл шығарылатын өнімнің сұранысқа ие екенін көрсетеді. Біз өндірісті кеңейтіп, сотталғандарға арналған жұмыс орындарының санын арттыруға ұмтылып отырмыз. Бұл оларға еңбек дағдыларын меңгеруге, тұрақты табыс табуға және отбасыларына материалдық қолдау көрсетуге мүмкіндік береді. Алдағы уақытта жұмысқа тартылған сотталғандардың санын 150 адамға дейін жеткізуді жоспарлап отырмыз, — деді сотталғандардың еңбегін ұйымдастыру бөлімінің бастығы Еркин Исабеков.