Мұнайлы ауданы полиция бөлімінің бастығы, полиция подполковнигі Баржиков Нуралин Абаевич Қызылтөбе-2 елді мекенінің тұрғындарымен кездесу өткізіп, қоғамдық қауіпсіздікті қамтамасыз ету және құқық бұзушылықтардың алдын алу мәселелерін талқылады.
Кездесу №18 жалпы білім беретін мектепте мектеп директоры мен ата-аналардың қатысуымен өтті.
Іс-шараға Мұнайлы ауданы полиция бөлімінің қоғамдық қауіпсіздік бөлімшесі отбасы-тұрмыстық зорлық-зомбылыққа қарсы күрес тобының аға инспекторы, полиция капитаны Калубаева Райса Курбанбаевна, ювеналдық полиция тобының аға инспекторы, полиция подполковнигі Сарбасова Жанат Сарсенбайқызы және криминалдық полиция бөлімшесінің жедел уәкілі, полиция аға лейтенанты Абатбай Берік қатысты.
Кездесу барысында отбасылық-тұрмыстық зорлық-зомбылықтың алдын алу, кәмелетке толмағандардың құқықтары мен заңды мүдделерін қорғау, балалардың қауіпсіздігін қамтамасыз ету, есірткі қылмысының алдын алу және интернет-алаяқтықтан сақтану мәселелері түсіндірілді.
Полиция қызметкерлері азаматтарға отбасында жанжал туындаған жағдайда құқық қорғау органдарына дер кезінде жүгінудің маңыздылығын атап өтті. Зорлық-зомбылық фактілері орын алған жағдайда полицияға «102» арнасы арқылы хабарласу тәртібі түсіндірілді.
Ювеналдық полиция инспекторы балалардың қауіпсіздігіне ерекше тоқталып, ата-аналарға олардың бос уақытын бақылау, интернеттегі қауіпсіздігін қамтамасыз ету және бейтаныс адамдармен қарым-қатынаста сақ болу қажеттігін жеткізді.
Сонымен қатар тұрғындарға интернет-алаяқтықтың кең таралған тәсілдері түсіндіріліп, банк картасының деректері мен SMS-кодтарды бөгде адамдарға бермеу қажеттігі ескертілді.
Есірткінің заңсыз айналымының алдын алу мәселесіне де назар аударылды. Полиция қызметкерлері ата-аналарды балаларының мінез-құлқындағы өзгерістерге мұқият назар аударып, күмәнді жағдайлар анықталған кезде дер кезінде тиісті органдарға хабарлауға шақырды.
Кездесу барысында тұрғындар қоғамдық тәртіп, жол қауіпсіздігі, аумақты абаттандыру және құқық бұзушылықтардың алдын алу бойынша өздерін толғандырған мәселелерін көтерді.
Полиция бөлімінің бастығы тұрғындардың ұсыныстарын тыңдап, полиция мен халық арасындағы өзара байланысты нығайтудың маңыздылығын атап өтті.
Полиция мен тұрғындардың бірлескен жұмысы қоғамдық қауіпсіздікті қамтамасыз ету және құқық бұзушылықтардың алдын алуда маңызды рөл атқарады.
Ақпарат көзі : https://www.gov.kz/memleket/entities/mvd-mangystau/press/news/details/1293527?lang=ru
Жауап қалдыру