2026 жылғы 17 қыркүйекте Астана қаласындағы Азиядағы өзара іс-қимыл және сенім шаралары кеңесі Хатшылығында Даму саласындағы ынтымақтастық агенттіктері мен негізгі серіктестерге арналған АӨСШК Қорының (CICA Fund) таныстырылымы өтті. Іс-шараға АӨСШК Бас хатшысы, Елші Қайрат Сарыбай, Хатшылық өкілдері, халықаралық ұйымдар мен өңірлік даму агенттіктерінің басшылары қатысты.
Кездесу барысында АӨСШК Қорының тұжырымдамасы мен оның өңірлік жобаларды қаржыландырудағы мүмкіндіктері таныстырылды.
Шарада сөз сөйлеген «KazAID» Басқарма төрағасы Нұрғали Арыстанов агенттіктің 2020 жылдан бері атқарған жұмыстарына, атап айтқанда «Авиценна» (денсаулық сақтау), «Достық» (цифрландыру және дипломатия) мен кәсіпкерлікті дамыту сияқты флагмандық бағдарламаларына тоқталды. Сондай-ақ KazAID басшысы азық-түлік қауіпсіздігі, су ресурстарын басқару және халықаралық сауда салаларындағы келешегі бар бағыттарды атап өтті.
KazAID АӨСШК Қоры шеңберінде бекітілген жобаларды іске асырушы өңірлік серіктес (executing agency) ретінде өз инфрақұрылымын ұсынуға және кадрлық әлеуетті арттыру мен бірлесіп қаржыландыру бағыттары бойынша тығыз әріптестік орнатуға дайын екенін білдірді.
Ақпарат көзі : https://www.gov.kz/memleket/entities/kazaid/press/news/details/1294237?lang=ru
Жауап қалдыру