Алматыда неонатология саласына арналған «Шала туған нәрестелерді күтіп-баптаудың заманауи тәсілдері: мультидисциплинарлық тәсіл» атты ғылыми-практикалық конференция өтті. Іс-шараның ашылуына Алматы қаласы Қоғамдық денсаулық сақтау басқармасының басшысы Марат Пашимов қатысты.
«Бұл конференцияның тақырыбы Алматы үшін ерекше маңызды. Қалада жыл сайын 36 мыңнан астам бала дүниеге келеді, оның ішінде 2 800-ден астамы – шала туған нәрестелер. Бүгінде перинаталдық және неонаталдық көмектің дамуының арқасында дене салмағы өте төмен, оның ішінде салмағы 500 грамнан басталатын нәрестелерді де аман алып қалуға мүмкіндік бар», – деді Марат Пашимов.
Оның айтуынша, мұндай жағдайлардың әрқайсысының артында заманауи технологиялар, мамандардың тәжірибесі және бүкіл медициналық команданың үйлесімді жұмысы тұр.
Алматыда нәрестелерге медициналық көмек көрсету инфрақұрылымы дамып келеді: материалдық-техникалық база нығайтылып, диагностика мен қарқынды терапияның заманауи әдістері енгізілуде. Сонымен қатар медицина кадрларын даярлауға және олардың біліктілігін тұрақты арттыруға ерекше көңіл бөлінеді.
Бұл ретте көмек бала стационардан шыққаннан кейін де жалғасын табады. Қалада ерте араласу және оңалту жүйесі дамып келеді. Ол баланың жағдайын бақылауға, дамуындағы ықтимал ауытқуларды дер кезінде анықтауға және қажетті көмек көрсетуге мүмкіндік береді.
Конференцияға Қазақстаннан және шетелдерден келген мамандар қатысты. Сарапшылар терең шала туған нәрестелерді күтіп-баптаудың практикалық мәселелерін, асқынулардың алдын алуды, заманауи технологияларды және кішкентай пациенттерді одан әрі бақылау мәселелерін талқылады.
Кәсіби тәжірибе алмасу неонатологиялық көмекті одан әрі жетілдіруге, мерзімінен бұрын дүниеге келген балалар мен олардың отбасыларының өмір сапасын арттыруға бағытталған.
Ақпарат көзі : https://www.gov.kz/memleket/entities/almaty-densaulyk/press/news/details/1299273?lang=ru
Жауап қалдыру