Құрметті отандастар!
Баршаңызды Республика күнімен құттықтаймын!
Бұл еліміздің тарихи таңдауын айқындаған Егемендік декларациясы қабылданған күн. Сондықтан бұл мерекенің біз үшін орны бөлек, маңызы өте жоғары.
Қазақстанның басты байлығы – еліміздің азаматтары. Мемлекет басшысы Қасым-Жомарт Тоқаев қарапайым еңбек адамының мәртебесін көтеріп, абыройын асқақтатуға баса мән берілу керектігін жиі айтып келеді. Президент елімізде 2025 жыл – жұмысшы мамандықтары жылы деп жариялады.
Қазақстанда су шаруашылығы саласында он мыңнан астам адам еңбек етеді. Министрлік құрылған күннен сушылардың мәртебесін арттыру бағытында белсенді жұмыс атқарып жатыр.
Жыл басынан «Қазсушар» қызметкерлерінің еңбекақысы орта есеппен 25%-ға өсті. Біз келесі жылы да бұл жұмысты жалғастырамыз.
Биыл Республика күніне орай су саласының 34 маманы мемлекеттік наградалармен марапатталды. Еліміздегі бассейндік инспекцияларға 20 автокөлік табысталды.
Министрлік алдағы бірнеше жылда су шаруашылығы техникаларының 65-70%-ын жаңартуға ниетті. Мәселен, келесі суару маусымына дейін «Қазсушар» филиалдарын 757 жаңа техника және арнайы жабдықпен қамтамасыз етуді жоспарлап отыр. Оның ішінде шынжыр табанды техника, эксковаторлар, ауыр жүк көліктері мен тракторлар бар.
Бұл үлкен өзгерістердің бастамасы. Себебі, еліміздің су қауіпсіздігін қамтамасыз ететін мамандардың еңбегі лайықты түрде бағалануы тиіс.
Әрқайсыңызға зор денсаулық, күш-жігер мен толағай табыс тілеймін! Еліміздің егемендігі баянды болсын!
Ақпарат көзі : https://www.gov.kz/memleket/entities/water/press/news/details/872059
Жауап қалдыру