Бүгін Дәрілік заттар мен медициналық бұйымдарды сараптау ұлттық орталығы базасында Денсаулық сақтау вице-министрі Тимур Мұратовтың төрағалығымен фармацевтикалық өндіріс өкілдері, бизнес және салалық қауымдастықтар қатысқан жұмыс кездесуі өтті. Жиын барысында дәрілік заттарды тіркеу құжаттамасын Еуразиялық экономикалық одақ талаптарына сәйкестендіру мәселелері талқыланды.
Кездесу барысында дәрілік заттардың айналымына қатысты нормативтік-құқықтық актілерді жетілдіру, өтінім беру және тіркеу құжаттамаларын цифрландыру, сараптамалық жұмыстарды жүргізу тәртібі, дәрілік заттарды Қазақстанның ұлттық формуляры мен өмірлік маңызы бар дәрілік препараттар тізіміне енгізу, сонымен қатар көтерме және бөлшек саудадағы шекті бағаларды қалыптастыру сияқты басқа да өзекті мәселелер қаралды.
Тимур Мұратов дәрілік заттарды тіркеу бойынша ЕАЭО ережелеріне сәйкес ұлттық тіркеу куәліктерінен ЕАЭО үлгісіндегі куәліктерге көшу мерзімі осы жылдың соңында аяқталатынын атап өтті. Сондықтан нарықта айналымда жүрген барлық дәрілік зат белгіленген мерзімге дейін тіркеу рәсімдерінен өтуі тиіс. Осыған байланысты Денсаулық сақтау министрлігі мен барлық мүдделі тараптың алдында ЕАЭО ережелеріне көшу кезеңінен сәтті өту міндеті тұр.
Медициналық және фармацевтикалық бақылау комитетінің төрағасы Бауыржан Жүсіповтің айтуынша, қазіргі таңда ЕАЭО талаптарына сәйкестендірілген тіркеу құжаттамасының пайыздық көрсеткіші 26,6%-ды құрайды. Қазақстан Республикасының Үкіметі де биылғы жылдың соңына дейін елде тіркелген дәрілік заттардың тіркеу құжаттамасын ЕАЭО-ның бірыңғай талаптарына сәйкестендіру жұмысын жүзеге асыру міндетін қойып отыр. Комитет төрағасы реттеуші орган мен сараптама ұйымының өндірушілердің сәйкестендіру рәсімінен дұрыс өтуіне және дәрілік заттардың халыққа қолжетімді болуын қадағалауға бағытталған шараларды белсенді түрде әзірлеп жатқанын атап өтті. Сонымен қатар Комитет пен Ұлттық орталық тіркеу кезінде туындайтын күрделі сұрақтарды талқылау бойынша ашық диалогқа дайын екенін айтып, тұрақты түрде кездесулер өткізуді ұсынды.
Жиын барысында ДЗ мен МБ СҰО сарапшылары дәрілік заттардың тіркеу құжаттамасын ЕАЭО ережелеріне сәйкестендіру бойынша өзекті статистиканы ұсынды. Бүгінде Қазақстанда тіркелген 6926 дәрілік заттың 4476 түрі нарықта айналымда жүр. Олардың 1019-ы отандық өндірістен шыққан, ал 3,5 мыңға жуығы шетелдік өндірушілерге тиесілі.
2025 жылдың наурыз айына дейін ЕАЭО ережелеріне сәйкестендіру бойынша жалпы алғанда 1191 өтінім қабылданған, бұл нарықта айналымда жүрген дәрілік заттардың 26,6%-ын құрайды. Жоспарланған кестеге сәйкес, отандық өндірушілер 879 атау бойынша тіркеу құжаттамасын сәйкестендіруі тиіс, қазір бұл санатта 253 өтінім берілген. Ал 3457 шетелдік дәрі-дәрмек атауының 938-і бойынша өтінім ұсынылған.
Ұлттық орталық сарапшылары өндірушілерді қолдауға және бизнеске консультациялық көмек беруді арттыруға бағытталған бірқатар шараларды атап өтті:
-отандық өндірушілер үшін құжаттаманы ЕАЭО талаптарына сәйкестендіру бойынша сараптамалық жұмыстарды жүргізу құны 90%-ға төмендетілді;
-ЕАЭО аясындағы дәрілік заттарға сараптама жүргізу бойынша портал әзірленіп, іске қосылды;
-ЕАЭО аясында тіркеу құжаттарын жіберу мәселесі шешіліп, ЕАЭО-мен дерек алмасу процесі штаттық режимде жүзеге асуда;
-ЕАЭО рәсімдеріне қатысты бизнеске кеңес беру үшін call-орталық жұмыс істейді, сондай-ақ сараптамаға қабылданған өтінімдер бойынша түсіндіру жұмысын жүргізу мақсатында апталық кездесулер ұйымдастырылады.
Кездесу қорытындысы бойынша қатысушылар жедел ақпарат алмасудың маңызын атап, еуразиялық интеграция аясында ортақ міндеттерді шешу үшін бірлесе жұмыс жасауға дайын екенін білдірді.
Ақпарат көзі : https://www.gov.kz/memleket/entities/kmfk/press/news/details/961724?lang=kk
Жауап қалдыру