ҚР Сауда және интеграция вице-министрі Жанель Кушукова Түркиямен сауда-экономикалық ынтымақтастықты кеңейту мәселелері бойынша Ыстанбұлда жұмыс кездесулерін өткізді

Қазақстан Республикасының Сауда және интеграция вице-министрі Жанель Сабырқызы Кушукова Түркия Республикасындағы сапары аясында түрік мемлекеттік және іскер топтарының өкілдерімен екіжақты сауда-экономикалық байланыстарды дамытуға бағытталған бірнеше кездесу өткізді.

Қазақстан делегациясының құрамында Түркиядағы Қазақстан Республикасының Сауда өкілдері Дархан Бейсенбай мен СәлімжанТойлыбек, сондай-ақ QazTrade компаниясының Бас директорының орынбасары Нұрлан Құлбатыров болды.

Кездесу барысында Ыстанбұл сауда палатасының Президенті Шекиб Авдагичпен екі елдің бизнес қауымдастықтары арасындағы ынтымақтастықты тереңдету мәселелері қарастырылды. Қазақстан өнімдерін Түркия нарығында насихаттау, отандық өндірушілердің халықаралық көрмелерге қатысуын кеңейту, сондай-ақ түрік кәсіпкерлерін Қазақстан компанияларының өнімдері мен мүмкіндіктері туралы ақпараттандыруға ерекше назар аударылды.

Қазақстан делегациясы Түркияның Экспорттаушылар кеңесіне (TIM) барды, онда экспортты қолдаудың ұлттық жүйесімен танысты. TIM өкілдері Түркия брендтерін халықаралық нарықта насихаттауға бағытталған Turquality бағдарламасын және шетел нарықтарында өнімдерді кешенді жылжыту үшін «қосымша брендтер» тұжырымдамасын ұсынды. Түрік компанияларының халықаралық нарықтарға шығу және экспортты ынталандыру механизмдері де қызығушылық тудырды.

Сапар соңында түрік кәсіпкерлігінің, логистика мен қаржы ұйымдарының 30-дан астам өкілдерінің қатысуымен дөңгелек үстел өтті. Қатысушылар арасында Hepsiburada, Turk Eximbank, Çalık Holding, S Sistem Lojistik, Coca-Cola және басқа да компаниялар болды.

Электрондық коммерция, логистика, экспорттық операцияларды қаржылық қолдау, сондай-ақ инвестициялық серіктестікті кеңейту мәселелері талқыланды.

Түрік компаниялары құрылыс, көлік инфрақұрылымын дамыту, дәрі-дәрмек және азық-түлік өндірісі салаларында жобаларға қатысуға ерекше қызығушылық танытты. Сонымен қатар, IT және GIS технологиялары саласындағы қызмет көрсетушілер Қазақстан серіктестерімен ынтымақтастыққа дайын екендіктерін мәлімдеді.

Қорытындысында Вице-министр Жанель Кушукова Қазақстан мен Түркия арасындағы бизнес өзара іс-қимылының жоғары деңгейін атап өтіп, бар байланыстарды кеңейту және жаңа ынтымақтастық мүмкіндіктерін іздеу қажеттігін айтты.

Ақпарат көзі : https://www.gov.kz/memleket/entities/mti/press/news/details/975265?lang=kk