15 сәуір – Қазақстанда «Қозы Көрпеш – Баян Сұлу күні» аталып өтетін Ғашықтар күні. Бұл – адалдық пен кіршіксіз махаббаттың символына айналған ерекше мереке. Осы күні қызметтің қатаң тәртібі мен ауыр күнделікті өмірінің арасынан өз бақытын тапқан жандар туралы айтқымыз келеді. Олар – форманы абыроймен киіп, жүрегімен сүйе білетін жандар.
Қонаев қалалық полиция басқармасының учаскелік инспекторы Қазбек Қапар мен криминалист Назерке Серікбайдың махаббат хикаясы – қазіргі заманғы романның беттерінен түскендей. Олардың таныстығы 2020 жылдың тамызында, Назерке Жамбыл ауданынан Қонаевқа ауысып келген кезде басталған. Әуелі – әріптес, сосын – сырлас дос, ал 2021 жылдың наурыз айынан бастап – жарасымды жұпқа айналды. Олар сенім мен қолдауға, бір-біріне деген құрметке негізделген қарым-қатынасты біртіндеп қалыптастырды. Сол сенім оты кейін махаббатқа ұласты.
2023 жылдың тамыз айында олар отбасын құрды. Енді тек қызмет жолын ғана емес, ортақ шаңырақты да бірге көтеріп келеді. Бұл шаңырақ – мейірім мен сыйластыққа, бір-біріне деген мақтанышқа толы. Қазбек – учаскелік инспектор, халықтың мұң-мұқтажына құлақ асатын жан. Ал Назерке – қырағылық пен жан-жақты талдауды талап ететін криминалистика саласының маманы. Екеуі де қызметтің қиындығын жақсы түсінеді, бірақ одан да жақсырақ түсінетіні – жай ғана бірге болып, үнсіз қолдаудың қадірі.
Олардың махаббат хикаясы – нағыз сүйіспеншілік қолдау мен құрмет, ортақ арман мен мақсат бар жерде ғана баянды болатынын дәлелдейді. Кейде жүрекке жететін ең үлкен мойындау – жай ғана жанынан табылып, үнсіз ғана «Мен сенің қасыңдамын» деп тұру.
Ғашықтар күнінде Қазбек пен Назеркенің махаббаты жыл сайын бекемдей түссін деп тілейміз. Отбасыларында әрдайым бейбітшілік, жылылық пен шаттық орнасын!
Жауап қалдыру