ҰЛТТЫҚ КИІМ – ҰЛТ БЕЙНЕСІ: ҰЛТТЫҚ ҚҰНДЫЛЫҚТАР МЕН МӘДЕНИЕТТІ ЖАҢҒЫРТУ

2025 жылғы 17 сәуірде Халықтар Достығы мен Мәдениет үйінде өткен «Ұлттық киім – ұлт бейнесі» атты фестиваль өз мәресіне жетті.

Іс-шараны облыстық дін істері басқармасы ұйымдастырды. Оның басты мақсаты – ұлттық киімнің тарихы мен терең мәнін дәріптеу арқылы ұлттық бірегейлікті сақтау, рухани құндылықтарды жандандыру және теріс діни ағымдардың алдын алу болды.

Фестиваль бағдарламасы:

Фестиваль аясында:

• Ұлттық киімдердің заманауи және дәстүрлі үлгілері ұсынылған сән көрсетілімі;

• Қолөнер бұйымдарының жәрмеңкесі мен көрмесі;

• Шеберлік сағаттары ұйымдастырылып, қонақтар халқымыздың киім үлгілері арқылы мәдениетіміздің терең тарихына үңілуге мүмкіндік алды.

Қонақтар мен қатысушылар:

Фестивальдің құрметті қонағы, қоғам қайраткері Дана Нұржігіт өз сөзінде қазақ халқының мәдениетін, салт-дәстүрін сақтап қалу жолындағы қайсарлығы мен табандылығын ерекше атап өтті. Ол ұлттық киімді – ұлттың рухани коды деп бағалап, бұл мұраның жас ұрпақ үшін маңызын айшықтады.

Дінтанушы Нұрлан Байжігітұлы Ұлытау өңірінің ұлттық құндылықтарды қайта жаңғыртудағы рөлін жоғары бағалап, ұлттық киімнің ата-бабадан қалған қасиетті аманат екеніне тоқталды. Бұл мұраны сақтап, насихаттау – бүгінгі буынның тарихи жауапкершілігі екенін атап өтті.

Сонымен қатар, фестивальде:

• «Aida KaumeNOVA» сән үйі – заманауи стильмен үйлескен ұлттық киім үлгілерін көрсетті;

• Гүлнұр Бекбатыр мен Мадина Бектай (Алматы қаласы) – ұлттық киімдерге жаңа көзқарас пен шығармашылық серпін ұсынды.

Фестиваль қорытындысы:

Барлық қатысушылар ұлттық киімге деген шығармашылық көзқарастарымен бөлісіп, көрермендердің ыстық ықыласына бөленді.

Шарада Ұлытау облысы әкімінің орынбасары З.Ақылбекова сән көрсетіліміне қатысушы дизайнерлерді алғыс хатпен марапаттады.

Ұлттық киім – біздің рухани байлығымыз

Ұлттық киім – бұл тек сән үлгісі емес, ол – ұлттың тарихы, болмысы мен дүниетанымын бейнелейтін мәдени код.

Ұрпаққа мұра – рухани қазынамызды сақтайық!