Халықты қолжетімді әрі жайлы тұрғын үймен қамтамасыз ету – мемлекеттiк әлеуметтік саясаттың негізгі басымдықтарының бірі. Президент Қасым-Жомарт Тоқаев Қазақстан халқына Жолдауында әлеуметтік әділеттілік пен халықтың өмір сүру сапасын арттыру қажеттілігіне ерекше тоқталған болатын. Бұл міндет өңірлік деңгейде де кезең-кезеңімен жүзеге асырылып келеді, әсіресе тұрғын үй құрылысы саласында.
2023 жылы Ақмола облысында 650 мың шаршы метрден астам тұрғын үй пайдалануға берілді. Бұл 6 мыңнан астам отбасының баспана жағдайын жақсартуға мүмкіндік берді.
«Республикалық және облыстық бюджеттер есебінен 28 көпқабатты тұрғын үй салынды. Жалпы саны — 1571 пәтер», – деп хабарлады облыстық құрылыс, сәулет және қала құрылысы басқармасының басшысы Нұрсұлтан Әлімов.
Жаңа пәтерге ие болғандардың бірі – Көкшетау қаласының тұрғыны Сабина Жамшитова. Бұл оқиға оның отбасы үшін қуанышты ғана емес, аса маңызды әрі символикалық сәтке айналды.
«Анам тұрғын үй кезегіне осыдан 15 жыл бұрын тұрған еді. Өкінішке қарай, ол бұл күнге жете алмады. Бірақ мен, оның ұрпағы ретінде, баспанаға қол жеткіздім. Маған үйлі болуға көмектескен барлық адамдарға алғысымды білдіремін», – деді Сабина Жамшитова.
Әлеуметтік осал топтарды тұрғын үймен қамтамасыз етуге ерекше назар аударылуда. Осы мақсатта мемлекет есебінен 850 тұрғын үй сатып алынып, баспана кезегінде тұрған азаматтардың саны айтарлықтай қысқарды.
Облыстық құрылыс басқармасының мәліметінше, биыл 580 мың шаршы метр тұрғын үйді пайдалануға беру жоспарланған. Қазіргі уақытта 34 көпқабатты үйдің құрылысы жүріп жатыр. Оның ішінде 932 пәтерлік 24 үй жыл соңына дейін тапсырылады. Сонымен қатар, әлеуметтік осал топтарға арналған 251 пәтерді сатып алу көзделген.
«Бұл мақсатқа республикалық бюджеттен шамамен 3,5 миллиард теңге бөлінді. Оның 2,5 миллиард теңгеден астамы — трансферттер. Сол қаражат есебінен 188 пәтер сатып алынды. Қалған 63 пәтерді мемлекеттік бағалы қағаздар арқылы сатып алу жоспарланып отыр», – деп атап өтті Нұрсұлтан Әлімов.
Осылайша, өңірде азаматтардың, әсіресе ұзақ жылдар бойы кезекте тұрғандардың тұрғын үй жағдайын жақсартуға бағытталған жүйелі жұмыстар жалғасуда.
Ақпарат көзі : https://www.gov.kz/memleket/entities/aqmola-uvp/press/news/details/994895?lang=kk
Жауап қалдыру