Айдын Байбеков, Қордай орталық аудандық ауруханасының бас дәрігері
Оңтүстік Кореяда өткен кәсіби тағылымдамам мен үшін жай ғана тәжірибе алмасу емес, аудандық денсаулық сақтау жүйесін жаңғыртуға бағытталған нақты идеялардың бастау көзі болды.
Сапар барысында біз Сеулдегі алдыңғы қатарлы медициналық мекемелерді — Dongguk университеттік клиникасын, H+ Yangji госпиталін және елдегі ең ірі ауруханалардың бірі — Asan Medical Center-ді аралап шықтық. Оларда жоғары технологиялы хирургиялық көмектің қалай ұйымдастырылғанын көріп, аз инвазивті және робот көмегімен жасалатын операциялардың жүргізілу барысымен таныстық. Ең бастысы — науқастың бүкіл медициналық процестің орталығында тұратынына көз жеткіздік.
Оңтүстік Корея бүгінде әлемдегі ең технологиялық дамыған денсаулық сақтау жүйелерінің бірі саналады. Әсіресе Da Vinci роботтандырылған хирургиялық жүйесін қолдану ерекше әсер қалдырды. Бұл құрылғы ең күрделі операцияларды аз қан жоғалтып, өте жоғары дәлдікпен жасауға мүмкіндік береді. Біз куә болған холецистэктомия кезінде пациенттің жағдайы тез тұрақтанып, операциядан кейін қалпына келу уақыты айтарлықтай қысқарғанын байқадық. Бұл – хирургияның болашағы жоғары технологиялы әрі аз жарақатпен жасалатын әдістерде екенін нақты дәлелдейді.
Меніңше, мұндай тәсілдер Қазақстандағы аудандық ауруханаларға да енгізілуі тиіс. Бұл — арман емес, нақты мақсат. Осы сапардан алған тәжірибеміз негізінде біз қазірдің өзінде келесі бағыттар бойынша жұмыс істей бастаймыз:
Хирургиялық хаттамаларды қайта қарап, аз инвазивті тәсілдерге басымдық беру;
Пациент жағдайын бақылаудың цифрлық жүйелерін енгізу;
Отадан кейінгі күтім сапасын арттыру;
Медициналық персонал арасында командалық жұмысты күшейтіп, үздіксіз кәсіби оқытуды жүйелеу.
Бұл тағылымдама бізге денсаулық сақтау саласын дамытуда стратегиялық көзқарастың маңызын тағы бір мәрте көрсетті. Оңтүстік Корея медициналық технологияларға, кадр даярлау мен инфрақұрылымға тұрақты түрде инвестиция салады. Қазақстан да дәл осы бағытты ұстанып келеді. Президенттің Жолдауында да әрбір азамат үшін қолжетімді әрі сапалы медицина құру міндеті басым бағыт ретінде көрсетілген. Біз, аудандық деңгейде жұмыс істеп жүрген мамандар, осы міндетті жүзеге асыруға өз үлесімізді қосуға дайынбыз.
Тағылымдаманың тағы бір құнды жағы – әріптестермен болған кәсіби пікір алмасу. Оңтүстік Корея мен Қазақстанның түрлі өңірлерінен келген мамандармен болған диалог тәжірибе ғана емес, шабыт та сыйлады. Бұл кездесулерден біз бір нәрсені анық түсіндік: науқас – әрқашан алдыңғы орында тұруы тиіс, ал технология мен медицина — соған қызмет етуі қажет.
Осындай тағылымдамалар — жай ғана білім алмасу емес, қазақстандық медицинаның болашағына салынған инвестиция. Бұл — үйреніп қана қоймай, өзгеруге мүмкіндік беретін құнды сәттер. Ал біз — осы өзгерістерге дайынбыз.
Ақпарат көзі : https://www.gov.kz/memleket/entities/zhambyl-densaulyk/press/news/details/997604?lang=kk
Жауап қалдыру