Жамбыл облысы Қордай ауданында 48 отбасыға пәтер кілттері табысталды. Салтанатты шараға аудан әкімі Бегзат Болатбеков қатысып, қоныс той иелерінің қуанышына ортақтасты.
– Халықтың әлеуметтік осал топтарына қолдау көрсету, оларды қолжетімді баспанамен қамтамасыз ету – мемлекеттік саясаттың басты міндеттерінің бірі. Бүгін пайдалануға беріліп отырған тұрғын үйлер – Мемлекет басшысының әлеуметтік бағыттағы саясатының ауданымызда нақты жүзеге асып жатқан айқын дәлелі. Бұл – елдің қамын ойлаған бірліктің, тұрақтылықтың жемісі деп білемін. Жаңа қоныс баршаңызға құтты болсын! – деді аудан әкімі.
Жаңа тұрғын үйлер Қордай ауылының «Шығыс» шағынауданында орналасқан. Барлық баспана екі бөлмелі, оның ішінде жатын және қонақ бөлмелері, сондай-ақ асхана мен әжетхана қарастырылған.
Аталған шағынауданда тұрғын үй құрылысы жалғасуда. Жыл соңына дейін тағы 96 отбасы баспаналы болады деп күтілуде.
– Мен үшін бүгін қуанышқа толы күн. Көптен күткен сәтке де жеттім, – деді шарада сөз алған Карина Қасымбекова. – Ата-ана қамқорлығынсыз қалғаннан бері өз үйім болса екен деген арманым болған. Сол тілегім бүгін орындалып отыр.
Салтанатты шарада аудандық ардагерлер кеңесінің төрағасы Біржан Әлімбет қоныс той иелерін құттықтап, бақыт пен шаттық тіледі.
Ақпарат көзі : https://www.gov.kz/memleket/entities/zhambyl/press/news/details/1007380?lang=kk
Жауап қалдыру