Жұмыс сапары аясында Жамбыл облыстық денсаулық сақтау басқармасының басшысы Сержан Назарбек 13-шағын ауданындағы Жамбыл облыстық көпбейінді балалар ауруханасының аумағында орналасқан №2 “Байтерек” жедел медициналық жәрдем қосалқы станциясына барды.
Аталған қосалқы станция қала тұрғындарына шұғыл медициналық көмек көрсету жүйесіндегі маңызды буын болып табылады. Мұнда тәулік бойы алты жылжымалы бригада кезекшілік атқарып, шұғыл шақыртуларға жедел әрекет етеді. Жалпы қосалқы станцияда 78 қызметкер төрт ауысымда жұмыс істейді. Олардың 54-і — білікті фельдшер, ал 24-і — санитарлық автокөліктің жүргізушісі.
Қызмет көрсету аумағы кең аймақты қамтиды: Аса, Жансая, Байтерек шағын аудандары, Қарасу, Жасыл Кілем, Арай, Арай-2, Көктем, Дорожник тұрғын массивтері, Бектөбе бөлімшесі, Қызылшарық, Байтеректің 3-бөлімшесі, сондай-ақ Шөлдала және Новоджамбулец саяжай массивтері.
Күн сайын қосалқы станция бригадалары 110–120 шақыртуға шығып, ересектер мен балалардың өтініштеріне бірдей шұғыл әрекет етеді. Барлық шақыртулар кідіріссіз орындалады (санаты мен шұғылдығына қарамастан).
Бұл — персоналдың кәсіби даярлығының жоғары деңгейі мен ұжым жұмысының үйлесімділігін көрсетеді.
Сапар барысында Сержан Назарбек медицина қызметкерлерінің еңбек жағдайымен, қосалқы станцияның техникалық жабдықталуымен танысып, қызметкерлердің жұмыс тиімділігін арттыруға қатысты ұсыныстарын тыңдады. Басқарма басшысы қызметкерлерге жедел жәрдем жұмысын жандандыру бойынша тиісті тапсырмалар беріп, бұл бағыттағы жұмыстарды өрбіту бойынша олардан жетістіктер күтетіндігін жеткізді.
Ақпарат көзі : https://www.gov.kz/memleket/entities/zhambyl-densaulyk/press/news/details/1008051?lang=kk
Жауап қалдыру