Шығыс Қазақстан облыстық ауруханасының кардиохирургтері 37 жастағы науқасқа жүректегі сирек кездесетін – миксома деп аталатын – ісікті алып тастау бойынша күрделі операция жасады. Әйел адам өзін жайсыз сезініп, дәрігерлерге жүгінген. Жүргізілген тексеру нәтижесінде мамандар жүректің сол жақ жүрекшесінде орналасқан көлемді ісікті анықтап, оның өмірге айтарлықтай қауіп төндіретінін айтты.
Кардиохирург Шыңғыс Балтабековтың айтуынша, миксома – қатерсіз ісік, алайда ол тромбоэмболияға, жүрек ырғағының бұзылуына және естен тануға себеп болуы мүмкін. Уақтылы ем көрсетілмесе, бұл жағдай қайғылы аяқталуы ықтимал еді.
Дәрігерлер шұғыл операция жасау туралы шешім қабылдап, ісікті толықтай алып тастады. Ота сәтті өтті – жүректің маңызды құрылымдары зақымданған жоқ. Қазір науқас есін жиып, мамандардың бақылауында. Дәрігерлер оның өміріне ешқандай қауіп жоқ екенін айтты.
Ақпарат көзі : https://www.gov.kz/memleket/entities/vko-oskemen/press/news/details/1005121?lang=kk
Жауап қалдыру