Қоғамдық денсаулықты қорғау ісіне үш онжылдықтан астам уақытын арнаған Нәзира Жакияқызы Доскенованың еңбек жолын дәл осылай сипаттауға болады. Санитариялық-эпидемиологиялық қызмет ол үшін жай ғана мамандық емес, бүкіл өмірінің мәніне айналды.
Медицина қызметкерлері күні қарсаңында біз шулы диагноздар мен шұғыл шақыртулардың сыртында қалып, күнделікті еңбегімен әлемімізді қауіпсіз етіп отырған жандар жайында сөз қозғаймыз. Нәзира Жакияқызы – солардың бірі.
Ол Солтүстік Қазақстан облысының Ғабит Мүсірепов атындағы ауданына қарасты Алғабас ауылында дүниеге келген. Жастайынан мақсаткерлігімен және «адамдарға пайдам тисе екен» деген тілегімен ерекшеленді. Бұл қасиеттер оны Қарағанды мемлекеттік медицина институтына алып келді. Ол аталған оқу орнын 1981 жылы санитариялық-гигиеналық бейін бойынша дәрігер дипломымен табысты аяқтады.
Жоғары оқу орнын бітірген соң, еңбек жолын Рузаевка ауылында бастап, аудандық санитариялық-эпидемиологиялық стансада эпидемиолог-дәрігер болып жұмыс істеді. Сол жылдардың өзінде-ақ әріптестері оның кәсіби біліктілігін, жауапкершілігін және адамдар денсаулығына деген шынайы жанашырлығын жоғары бағалады.
2003 жылдан бастап оның кәсіби қызметі Көкшетау қаласында – Ақмола облысы бойынша санитариялық-эпидемиологиялық бақылау департаментінде жалғасын тапты. Жинақтаған тәжірибесінің және мінсіз іскерлік беделінің арқасында ол ауруханаішілік инфекциялар бойынша эпидқадағалау бөлімін басқарды. Қызметінің осы маңызды бағыты бойынша оның көшбасшылық қабілеті, терең білімі мен мол тәжірибесі толық ашыла түсті.
Нәзира Жакияқызы әрдайым тек үздік маман ғана емес, сонымен қатар жастар үшін тәлімгер бола білді. Өз тәжірибесімен қуана бөлісіп, жас әріптестерін қолдап, олардың бейімделуіне және нағыз кәсіби маман болып қалыптасуына көмектесті. Оны кәсібилігімен қатар жүрек жылуы, жанашырлығы мен адамгершілігі үшін ерекше қадірледі.
Ізгі ниеті мен өмірге белсенді көзқарасының арқасында ол Ақмола облысының медицина қауымдастығында зор құрметке ие болып, әріптестерінің шынайы алғысына бөленді.
Кәсіби мереке – Медицина қызметкерлері күні қарсаңында Нәзира Жакияқызына көпжылдық адал еңбегі үшін шынайы ризашылығымызды білдіреміз. Шын жүректен зор денсаулық, ұзақ ғұмыр, отбасылық жылылық пен амандық тілейміз!
Ақпарат көзі : https://www.gov.kz/memleket/entities/departament-kkbtu-akmolinsk/press/news/details/1013513?lang=kk
Жауап қалдыру