Атыраулық оқушылар республикалық олимпиададан жүлдемен оралды

18-21 мамырда Астанада жалпы білім беретін пәндер бойынша 7-8 сынып оқушыларына арналған республикалық олимпиада өтті. Зияткерлік жарысқа облыстан 22 оқушы қатысты.

Білім додасына еліміздің түкпір-түкпірінен үздік оқушылар қатысып, өз білімдерін сынады. Атырау облысының намысын қорғауға барған 22 оқушының 14-і жүлделі орынға ие болып, жетістікке қол жеткізді. Атап айтсақ, биология пәні бойынша Несібе Аманжол І орынды иеленсе, қалған қатысушылар ІІ, ІІІ орынды қанжығалады.

Облыс намысын қорғаған жас зияткерлер математика, жаратылыстану, тарих, әдебиет пәндері бойынша білімдерін ортаға салды.

Қатысушылар командалық есеп бойынша жүлделі ІІ орынды облыстың қанжығасына байлады.