КЕЛЕС: БІРТІЛЕКТЕ 300 ОРЫНДЫҚ ЖАҢА МЕКТЕП ҚҰРЫЛЫСЫ АЯҚТАЛУҒА ЖАҚЫН

Келес ауданының әкімі Жәнібек Ағыбаевтың аудан тұрғындарымен есепті кездесулері Біртілек ауылдық округінде жалғасын тапты. Жергілікті халықпен ашық әрі мазмұнды диалог орнату мақсатында ұйымдастырылған бұл жиында округтің әлеуметтік-экономикалық дамуы, инфрақұрылымның жай-күйі, сондай-ақ тұрғындарды толғандыратын өзекті мәселелер мен оларды шешу жолдары талқыланды.

Біртілек ауылдық округінде соңғы жылдары тұрғындардың өмір сүру сапасын арттыру мақсатында бірқатар маңызды жұмыстар атқарылды. Ауылдық округтегі жолдар, электр энергиясы, ауыз су, табиғи газ, білім, спорт, көгалдандыру және байланыс салаларында жүйелі жобалар іске асырылып, айтарлықтай нәтижелерге қол жеткізілді.

 

Өткен жылы округтегі бірнеше елді мекендерде электр желілері мен бағаналары жаңартылып, жаңа трансформаторлар орнатылды. Атап айтқанда, Амангелді, Көлтоған, Жолбасшы, Ораз ата және Игілік елді мекендеріндегі жобалар “Ауыл – ел бесігі” бағдарламасы аясында жүзеге асырылды. Біртілектегі барлық 12 елді мекен 100% табиғи газбен қамтылған. Ауыз су жүйесі де толықтай жүргізілген. Алайда Көлтоған елді мекенінде жаз айларында су тапшылығы байқалады. Бұл мәселені шешу үшін жаңа су станциясының құрылысы жоспарланған.

 

Тартулы, Шошым, Айнақұл және Азамат каналдары механикалық тазалаудан өтті. Жалпы ұзындығы 35 шақырымнан асатын су арналарының тазалануы егіншілік пен бау-бақшаға оң әсер етуде. Біртілек елді мекенінде 300 орындық жаңа «Жайлы мектептің» құрылысы аяқталуға жақын. Сонымен қатар, Амангелді мен Жолбасшы ауылдарында жаңа кіші футбол алаңшалары пайдалануға берілді.

 

Кездесу соңында округ тұрғындары аудан әкіміне өз ұсыныс-пікірлерін айтып, көкейлеріндегі сұрақтарын қойды. Жәнібек Ағыбаев әрбір сұраққа нақты жауап беріп, бірқатар мәселелер бойынша тиісті бөлімдерге тапсырмалар жүктеді. Аудан басшысы халықпен тұрақты кері байланыстың маңызды екенін атап өтіп, тұрғындардың белсенділігіне ризашылығын білдірді.

 

Келес ауданы әкімдігінің баспасөз қызметі