Ағымдағы жылдың 11 тамызы күні Орал қалалық мәслихатының төрағасы Қалиев Е.Ғ., қалалық мәслихат депутаттары Ашикова Н.Ә., Абенов Н.Н., Дудниченков М.М., Казанин Ю.В. Батыс Қазақстан облысының әкімі Нариман Төреғалиевпен, облыстық мәслихат төрағасы Мұрат Мұқаевпен, облыстық депутаттарымен және мемлекеттік мекеме басшыларымен бірге бірқатар маңызды құрылыстар және әлеуметтік, мәдени нысандарда жүріп жатқан қайта жаңғырту және жөндеу жұмыстарымен танысты.
Сапар барысында А.Н. Островский атындағы орыс және Х.Бөкеева атындағы қазақ драма театрларындағы қайта жаңғырту және күрделі жөндеу жұмыстарының барысы қаралды. Қазіргі таңда қос театрдың сахнасы, көрермен залы, техникалық жабдықтары жаңартылып қазіргі заманауи талаптарға сай орнатылуда. Бұл жұмыстар аяқталған соң, театрлар шығармашылық ұжымдардың жұмысын жақсартып қана қоймай, қала тұрғындары мен қонақтары үшін мәдени тынығу орталығына айналмақ.
Сонадай-ақ, делегация Жайық өзенінің жағалауында жүргізіліп жатқан абаттандыру мен жағалауды бекіту шараларымен, С.Датов ескерткіші алаңындағы жөндеу жұмыстарымен танысты.
Нысандарды аралау кезінде су басудан қорғау, экологияны сақтау және жақсарту мәселелері басты назарға алынды.
Облыс әкімі өз сөзінде атқарылып жатқан жұмыстардың қала мен оның тұрғындары үшін маңыздылығын атап өтіп:
«Бұл жобалардың барлығы тұрғындардың өмір сапасын арттыруға, қаланың келбетін жақсартуға бағытталған. Әр нысан белгіленген мерзімде әрі сапалы орындалуы қажет. Бұл тұрғындардың жайлылығы мен өңірдің дамуына тікелей әсер ететін маңызды міндет» – деді әкім.
Ақпарат көзі : https://www.gov.kz/memleket/entities/maslihat-uralsk/press/news/details/1049490?lang=kk
Жауап қалдыру