Жаңа оқу жылының қарсаңында мейірім мен ізгілікке толы игі дәстүр қайта жалғасын тапты. Тамыздың алғашқы күнінен бастап елімізде «Мектепке жол» республикалық қайырымдылық акциясы бастау алды. Бұл — көмекке зәру балғындарға үміт сыйлайтын, қайырымды жандардың шапағаты сезілетін ерекше бастама.
Акцияның басты мақсаты — аз қамтылған және көпбалалы отбасылардан шыққан, сондай-ақ ата-анасының қамқорлығынсыз қалған балаларға жаңа оқу жылына дайындық барысында қол ұшын созу. Әлеуметтік жағдайына байланысты мектеп табалдырығын аттай алмай қалу қаупін жою — осы акцияның арқауы.
Акция аясында төмендегідей жұмыстар қолға алынады:
– Оқушыларға мектепке қажетті құрал-жабдықтармен көмек көрсету;
– Әлеуметтік қиындықтарға тап болған балаларды мектеппен қамту;
– «Жедел желі» және «Сенім телефондары» арқылы дер кезінде жауап беру;
– Арнайы көмек қабылдау пункттерін ұйымдастыру.
Бұл шара — тек материалдық көмек емес, бұл — әр баланың бойына сенім, жүрегіне жылу ұялататын ізгі амал. Кішкентай жүректердің қуанышы — үлкендердің мейірімділігімен тікелей байланысты.
Құрметті аудан тұрғындары!
Жақсылық жасаудан қашпаған халқымыз үшін бұл — тағы бір үлкен сауапты іс. Баршаңызды осы игі шараға белсене қатысуға шақырамыз. Бірге жүріп жақсылық жасайық, балалардың болашағына үміт сыйлайық!
Мекенжайымыз:
Батыс Қазақстан облысы, Шыңғырлау ауданы,
Л.Қылышев көшесі, 89 үй
Байланыс телефондары:
+7 (71137) 34284
+7 (775) 667-64-32
Қайырымдылық – адамгершіліктің айнасы! Аудандық білім беру бөлімінің баспасөз маманы Аягөз Бақтығали
Ақпарат көзі : https://www.gov.kz/memleket/entities/bilim-chingirlau/press/news/details/1054091?lang=kk
Жауап қалдыру