Шығыс Қазақстан облысы әкімдігінде облыс әкімі Нұрымбет Сақтағановтың төрағалығымен жұмыс жиыны өтті. Онда өңірдің дамуына қатысты басым бағыттар талқыланды. Күн тәртібінде — алдағы жылыту маусымына дайындық, инфрақұрылымды жаңғырту, туризм мен өнеркәсіпті қолдау мәселелері болды.
Әлеуметтік нысандарды электр, жылу және сумен үздіксіз қамтамасыз етуге, сондай-ақ Өскемен қаласының сол жағалауындағы жылумен жабдықтау проблемасын шешуге ерекше назар аударылды. Бұл мәселе әлі де өзекті болып отыр. Әкім барлық жұмыстарда сапа мен белгіленген мерзімді қатаң сақтау керектігін атап өтті.
Туризм саласында Бұқтырма аймағындағы демалыс орындарын дамытуға басымдық берілді. Энергиямен қамтамасыз ету мәселелерін шешу туристік маусымды ұзартуға және өңірдің тартымдылығын арттыруға мүмкіндік береді. 2026 жылға арналған салалық даму жоспарын әзірлеу және «Altai Invest-2025» форумына дайындық бойынша аралық нәтижелерді ұсыну тапсырылды.
Сонымен қатар, жиында өнеркәсіп секторын қолдау және экспортты ұлғайту шаралары қаралды. Әр бағыт бойынша Нұрымбет Сақтағанов нақты тапсырмалар беріп, олардың орындалуын жеке бақылауына алатынын жеткізді.
Ақпарат көзі : https://www.gov.kz/memleket/entities/tourism-vko/press/news/details/1056866?lang=kk
Жауап қалдыру